वीरगन्जमा एक जना पुरूषको हत्या आरोपमा प्रहरीले पाँच जनालाई पक्राउ गरेको छ।
उनीहरूलाई वीरगन्ज महानगरपालिका-१० बस्ने २० वर्षीय गोल्डेन भनिने शिवम साह कानुको हत्या आरोपमा पक्राउ गरिएको हो।
बाराको परवानीपुर गाउँपालिका-९ घर भएका शिवमको असोज १४ गते मध्यराति कुटपिट गरी हत्या भएको थियो।
जिल्ला प्रहरी कार्यालय पर्साका डिएसपी हरिबहादुर बस्नेतका अनुसार पक्राउ पर्नेमा १९ वर्षीय गौतम पटेल, २० वर्षीय शुभांकर चौरसिया, २२ वर्षीय अमिरी भन्ने करणप्रसाद पटेल, २४ वर्षीय चन्दन चौरसिया र १९ वर्षीय अमन पटवा छन्।
उनीहरूले आफूलाई आपराधिक समूह 'खुनी दरिन्दे' को सदस्य भएको बताएका छन्। उनीहरूले आफूहरूले कुरा गर्ने ह्वाट्सएप ग्रुपको नाम पनि खुनी दरिन्दे राखेको पाइएको छ।
वीरगन्ज-२४ रामगढवाका उनीहरू पहिल्यैदेखि आपराधिक गतिविधिमा संलग्न भएको एक प्रहरीले बताए। मानिसहरूलाई धम्क्याउने, लागुऔषध प्रयोग गर्ने लगायत विभिन्न क्रियाकलाप गरी उनीहरूले वीरगन्जमा आफ्नो दबदबा राख्न खोजेको ती प्रहरीको भनाइ छ।
पक्राउ परेकामध्ये मुख्य व्यक्ति अमन पटवा रहेको पाइएको छ।
गोल्डेन भनिने शिवमसँग उनीहरूको पुरानो रिसइबी रहेको प्रहरीले जनाएको छ।
शिवम अस्टमीको रात गीता मन्दीर नजिकै मेला हेर्न गएका थिए। त्यही बेला मध्यराति साढे ११ बजेतिर एकाएक शिवममाथि उनीहरूले भाटा र हतियार प्रहार गरी भागेका थिए।
उनीहरूमध्येका एक गौतम पछि शिवम जिउँदै भए/नभएकोबारे बुझ्नसमेत गएका थिए।
'गम्भीर घाइते बनाएपछि उनीहरू भागे। समूहका नाइकेले गौतमलाई फोन गरी शिवमको मृत्यु भएको, नभएकोबारे बुझ्न पठाएका थिए,' पर्साका एसपी सुदीपराज पाठकले भने।
घटनापछि उनीहरू पाँचै जना भारततर्फ भागेका थिए।
एसपी पाठकसहितको टोली मध्यराति नै घटनास्थल पुगेर अनुसन्धान अघि बढाएको थियो। मुचुल्का गरी शव पोस्टमर्टम गर्न नारायणी अस्पताल वीरगन्जमा लगिएको थियो।
सिसिटिभी फुटेज र त्यहाँ रहेका भिडिओहरूमार्फत घटनामा संलग्नहरूको पहिचान गरिएको हो। प्राविधिक विश्लेषण समेत गरी उनीहरू रहेको ठाउँ पत्ता लगाई २४ घण्टाभित्रै पक्राउ गरिएको प्रहरीले जनाएको छ।
उनीहरूलाई नेपाल-भारत सीमा नजिक भिष्वा भन्ने ठाउँबाट पक्राउ गरिएको हो।
प्रहरीले बिहीबार पत्रकार सम्मेलन गरी घटनाबारे जानकारी दिएको हो। पक्राउ परेकाहरूमाथि अनुसन्धान अघि बढाइएको र उनीहरू अन्य आपराधिक गतिविधिमा समेत संलग्न भएको प्रहरीको अनुमान छ।
-1746009348.jpg)
