खाना पकाउने ग्यास चुहिएर आगलागी हुँदा अछाममा २७ घर जलेको छ।
करिब सात करोड बढीको क्षति भएको अनुमान गरिएको छ।
जिल्ला प्रहरी प्रमुख डिएसपी ईश्वरी भण्डारीले आगलागी बाट १५ वटा टिनका टहरा भएका पसल, १० वटा ढुंगा माटोले बनेका घर र २ वटा पक्की घर नष्ट भएको बताए।
स्थानीय पुष्पराज शर्माको घरबाट आगो फैलिएको थियो।
बान्निगडी जयगढ गाउँपालिका ३ जयगढ बजारमा रहेको शर्माको घरमा मंगलबार बेलुका ७:२० बजेतिर खाना पकाउने ग्यास चुहिएर आगो सल्केको थियो।
केही बेरमै ग्यास सिलिण्डर बिष्फोट भई आसपासका घरहरूमा आगो फैलिएको डिएसपी भण्डारीले बताए। डिएसपी भण्डारीका अनुसार आगलागी भएको पालिका बान्निगडी जयगढ गाउँपालिका ३ मा दमकल थिएन।
जयगढ बजारमा आगोलागी हुँदा मंगलसेन नगरपालिकाको दमकल पुग्न ढिलाइ भएको थियो। बढी क्षति हुनुको कारण सम्बन्धित पालिकाको दमकल नहुनु र ढिला गरी मात्रै दमकल पुग्नुलाई पनि मानिएको छ।
मध्यरात साढे १२ बजे मात्रै आगो नियन्त्रणमा आएको डिएसपी भण्डारीले बताए।
‘प्रारम्भिक अनुमान अनुसार आगालागीबाट सात करोड बढीको क्षति भएको देखिन्छ,’ उनले भने, ‘क्षतिको विस्तृत प्रतिवेदन तयार पार्ने काम भइरहेको छ।’ आगो निभाउन नेपाल प्रहरी, सशस्त्र प्रहरी, नेपाली सेना र स्थानीय खटिएका थिए।
मंगलबार राति अछामको जयगढ बजारमा भएको आगलागीबाट पीडित परिवारहरूलाई सुदूरपश्चिम प्रदेश सरकारले ५० लाख रुपैयाँ आर्थिक सहयोग प्रदान गर्ने निर्णय गरेको छ।
बुधबार बिहान ९ बजेपछि बसेको प्रदेश विपद् जोखिम न्यूनीकरण तथा नियन्त्रण परिषद्को बैठकपछि आगलागी पीडितहरूलाई ५० लाख सहयोग गर्ने निर्णय भएको हो।
त्यो निर्णयबारे पत्रकार सम्मेलन गरिएको थियो। पत्रकारहरू माझ मुख्यमन्त्री कमलबहादुर शाहले प्रारम्भिक क्षतिको विवरणका आधारमा ५० लाख सहयोग गर्ने निर्णय गरिएको बताए।
रकम प्रदेश विपद् व्यवस्थापन कोषबाट बान्निगढी जयगढ गाउँपालिकालाई उपलब्ध गराइने मुख्यमन्त्री शाहले बताए।
आगलागीबाट भएको क्षतिको पूर्ण विवरण आएपछि थप सहयोग उपलब्ध गराइने मुख्यमन्त्री शाहले प्रतिबद्धता गरेका थिए।
आगलागीको पूर्ण विवरण संकलन गर्नका लागि सामाजिक विकासमन्त्री मेघराज खड्का र आन्तरिक मामिलामन्त्री हीरा सार्कीलाई घटनास्थल पठाइने मुख्यमन्त्रीका प्रेस संयोजक डम्बरबहादुर बमले जानकारी दिए।
-1746513231.jpg)
