दिउँसै मदिरा सेवनपछि मातेर कार्यालयमा आएर झैझगडा गरेका प्रमुख प्रशासकीय अधिकृतविरूद्ध मुद्दा चलाउने कार्यपालिका बैठकले निर्णय गरेको छ।
बुधबार बसेको कार्यपालिका बैठकले प्रमुख प्रशासकीय अधिकृतले गल्ती गरेको भन्दै कानुनी कारबाहीका लागि मुद्दा हाल्ने गर्ने निर्णय गरेको हो।
मेयर छविलाल थारूले कार्यपालिका बैठकले गैरजिम्मेवार हर्तक गरेको हुँदा प्रमुख प्रशासकीय अधिकृतमाथि कानुनी कारबाही गर्ने बैठकले निर्णय गरेको हो।
‘अब हामी केहीबेरमै मुद्दा हाल्न जाँदैछौं,’ मेयर थारूले भने, ‘उपमेयर सापले अभद्र व्यवहारसम्बन्धी र मैले साइबर क्राइमसम्बन्धी मुद्दा हाल्ने बैठकले निर्णय गरेको छ।’
बर्दियाको बारबर्दिया नगरपालिकाका प्रमुख प्रशासकीय अधिकृत दीपककुमार आचार्य मंगलबार दिउँसो मदिराले मातेर कार्यालयमा आएर उपमेयर रत्नकुमारी पाण्डेको कार्यकक्षमा गई झैझगडा गर्नुका साथै उदण्ड व्यवहार प्रदर्शन गरेका थिए।
प्रमुख प्रशासकीय अधिकृत आचार्यले उपमेयरको कार्यकक्षमा टेबल ठोक्दै होहल्ला गर्दै अपशब्द प्रयोग गर्नुका मेयर उपमेयरलाई सडक छाप बनाइदिने धम्की दिएका थिए।
मंगलबार दिउँसो मदिराले मातेर कार्यालयमा आएर सार्वजनिक रूपमै झैझगडा र गालीगलौजमा उत्रिएपछि मेयर आफैले प्रहरी प्रशासनलाई खबर गरेका थिए।
प्रहरीले प्रमुख प्रशासकीय अधिकृतसहित तीन जना कर्मचारीलाई पक्राउ गरेको थियो।
मापसे चेक गराउँदा अस्पतालमा प्रमुख प्रशासकीय अधिकृतले मापसे गरेको पुष्टि भएको थियो। उनीहरू तीनै जनालाई प्रहरीले आफन्तको जिम्मा लगाई मंगलबार बेलुका नै रिहा गरेको थियो।
मेयर थारूका अनुसार त्यसयता प्रमुख प्रशासकीय अधिकृत सम्पर्कविहीन बसेका छन्।
उनले प्रयोग गर्ने मोबाइल फोन भने प्रहरी कार्यालयमा छ।
यो पनि:
मदिराले मातेका प्रमुख प्रशासकीय अधिकृतले कार्यालयमै झगडा गरेपछि...
