काठमाडौंको शंकरापुर नगरपालिका-६ साँखुको सलम्बुटारमा युवराज थापाले द्वन्द्वपीडित तथा शारीरिक अपांगता भएकाहरूका लागि आश्रयस्थल सञ्चालन गरेका छन्।
२०६२ सालदेखि सञ्चालित उक्त आश्रयस्थलमा ६१ जना बस्दै आएका छन्।
ती ६१ जनामध्ये १० जनालाई एउटा टहरामा राखिएको छ। टहरा मुख्य सडकबाट थोरैमात्रै भित्र छ।
शुक्रबार बिहान सडकमा गुडेको टिपर अनियन्त्रित भएर ती १० जना सुतिरहेको टहरामा ठोक्कियो। टिपर टहराभित्र छिरेपछि सडकतर्फ सुतिरहेका तीन जनाको मृत्यु भयो।
टिपर सुरूमा सडकछेउको बिजुलीको पोलमा ठोक्किएर टहराभित्र छिरेको थियो। ठक्करबाट बिजुलीको पोलसमेत ढलेको छ।
बिजुलीको पोलमा ठोक्किएपछि त्यहाँ ठूलो आवाज आएको थियो। ठूलो आवाजले ब्युझिएका अरू टहरा र वरपरका घरका मानिसहरुले उठेर हेर्दा टिपर टहराभित्र छिरेको थियो।
बिजुलीको पोल नै ढलेपछि त्यहाँ विद्युत आपुर्ति पनि बन्द भएको थियो। 'त्यसपछि मोबाइलको टर्च बालेर त्यहाँ सुतिरहेकाहरुलाई निकाल्यौं,' एक स्थानीयले भने।
टहराको सडकतर्फको कुनापट्टि सुतिरहेका तीन जना गम्भीर घाइते अवस्थामा निकालिएको थियो। प्रहरीले ती घाइतेहरूलाई अत्तरखेलस्थित नेपाल मेडिकल कलेज पठायो।
त्यहाँ बिहान साढे ४ बजे चिकित्सकले तीनै जनालाई मृत घोषणा गरेको थियो। मृत्यु हुनेहरू तीनै जना २१ वर्षीय आकाश, २१ वर्षकै सुमन र अन्दाजी ४५ को हरिजन बोल्न नसक्ने अवस्थाका शारीरिक अपांगता भएकाहरू हुन्।
बा २ क ६५८० नम्बरको टिपर चालक सिन्धुपाल्चोकको मेलम्ची नगरपालिका-१२ का २५ वर्षीय सागर माझीलाई प्रहरीले नियन्त्रणमा लिएको छ।
प्रारम्भिक सोधपुछमा उनले टिपर चलाउँदा चलाउँदै आफू निदाएको भनेका छन्।
'चलाउँदा चलाउँदा निदाएछु, बाटो पनि भिरालो भिरालो थियो भनेका छन्। थप अनुसन्धान हुँदैछ,' काठमाडौं प्रहरी परिसरका एसपी अपिलराज बोहराले भने।
टहरामा सुतेका अरू सात जना भने सकुशल रहेको एसपी बोहराले जानकारी दिए।
तस्बिरहरूः
-ink-1741327506.jpeg)
-ink-1741327507.jpeg)
-ink-1741327507.jpeg)
-ink-1741327507.jpeg)
-ink-1741327506.jpeg)
सबै तस्बिरः सरिशा अछामी/सेतोपाटी।
