पाल्पाको तानसेन नगरपालिका-१४ साँचामा ५२ वर्षीय रूद्रबहादुर बुढाथोकीको हत्या भएको घटनामा सोही घरका घरबेटी पक्राउ परेका छन्।
बुधबार बिहान ८ बजे रूद्रबहादुर मृत फेला परेको घरका घरबेटी ३१ वर्षीय माधव विष्ट पक्राउ परेको जिल्ला प्रहरी कार्यालयका प्रवक्ता डिएसपी सुनिल मल्लले जानकारी दिए। उनकाअनुसार विष्टले हत्या स्वीकार गरिसकेका छन्।
रूद्रबहादुर रिब्दीकोट गाउँपालिका-१ जोगीथुमका हुन्। मजदुरी गर्ने उनी विगत ६ महिनादेखि तानसेन बस्दै आएका थिए।
साँचामा ढुंगामाटोले बनेको माधव विष्टको दुई तले घरको एउटा कोठामा मासिक ५०० भाडा बुझाउने गरी उनी बहालमा बसेका थिए। बुधबार बिहान कोठामै मृत भेटिएपछि प्रहरीले घरबेटी विष्टलाई नियन्त्रणमा लिएर घटनाको अनुसन्धान गरेको थियो। रूद्रबहादुरको शरीरमा चोटसमेत थियो।
अनुसन्धानका क्रममा विष्टले १४ सय रूपैयाँका लागि उनको हत्या गरेको खुलेको हो। उनले हँसिया प्रहार गरी रूद्रबहादुरको हत्या गरेको प्रहरीसमक्ष स्वीकार गरेका छन्।
डिएसपी मल्लका अनुसार रूद्रबहादुरले केही महिनाको जोडेर १४ सय रूपैयाँ घरभाडा तिर्न बाँकी रहेछ। त्यसदिन मदिराले मातिएका विष्टले कोठाभाडा माग्न आएका थिए।
'रूद्रबहादुरले आफूसँग पैसा नभएकाले दिन नसक्ने बताएपछि विष्टले हँसियाले अन्धाधुन्ध हानेको खुलेको खुलेको छ। थप अनुसन्धान भइरहेको छ,' डिएसपी मल्लले भने।
विष्टविरूद्ध जिल्ला अदालत पाल्पाबाट कर्तव्य ज्यान मुद्दामा ५ दिन म्याद थप गरी अनुसन्धान भइरहेको प्रहरीले जानकारी दिएको छ ।
