भैलो खेलिरहेको समूहलाई बसले ठक्कर दिँदा अर्घाखाँचीमा एक जनाको मृत्यु भएको छ।
सोमबार अर्घाखाँचीको भूमिकास्थान नगरपालिका-५ र ६ को सिमानामा पर्ने जयठाटीमा भैलो खेलिरहेको समूहलाई बसले ठक्कर दिँदा एक जनाको मृत्यु हुनुका साथै आठ जना घाइते भएको जिल्ला प्रहरी कार्यालय अर्घाखाँचीका प्रमुख प्रहरी नायब उपरीक्षक चक्रबहादुर मल्लले जानकारी दिए।
उनका अनुसार सोमबार साँझ ५ बजेतिर ना ३ ख २४७१ नं को बसको ब्रेक फेल हुँदा दुर्घटना भएको हो।
'बसको ठक्करबाट एक महिलाको घटनास्थलमै मृत्यु भएको छ भने उनको पहिचान खुलेको छैन,' उनले भने।
प्रहरी नायब उपरीक्षक मल्लका अनुसार घाइतेको उद्धार गरी उपचारको लागि जिल्ला अस्पताल सन्धिखर्कमा पठाइएको छ।
यस्तै, घटनाबारे थप अनुसन्धान भइरहेको जनाइएको छ।
