पाल्पामा एउटा ट्रकले अर्कोलाई ठक्कर दिँदा चालकको मृत्यु भएको छ।
गएराति पौने ११ बजे बुटवलबाट पोखरा जाँदै गरेको लु १ ख ९३९१ नम्बरको ट्रकले सोही दिशातर्फ जाँदै गरेको ना १ ख ७१२१ नम्बरको ट्रकलाई शिद्धार्थ राजमार्गस्थित पाल्पाको रम्भा गाउँपालिका-३ अगाहाखोलामा ठक्कर दिएको थियो।
ठक्कर दिने ट्रकका चालक रम्भा गाउँपालिका-३ का २३ वर्षीय भुवनसिंह रानाको मृत्यु भएको जिल्ला प्रहरी कार्यालय पाल्पाका सूचना अधिकारी डिएसपी सुनिल मल्लले जानकारी दिए।
दुर्घटनामा परी रानाको दाहिने खुट्टा ट्रकमै च्यापिएको थियो। उनलाई प्रहरीले उद्धार गरी उपचारका लागि लुम्बिनी मेडिकल कलेज प्रभासमा पुर्याएको थियो। त्यहाँ उपचारकै क्रममा रानाको मृत्यु भएको डिएसपी मल्लले जानकारी दिए।
अर्को ट्रकका सहचालक स्याङ्जाको वालिङ नगरपालिका-१० का २१ वर्षीय सञ्जित खवास सामान्य घाइते भएका छन्। उनको हातमा चोट लागेको छ। चालक सकुशल रहेको प्रहरीले जनाएको छ।
