बाँकेमा दुई मोटरसाइकल आपसमा ठोक्किँदा एक जनाको मृत्यु भएको छ भने अर्का एक जना गम्भीर घाइते छन्।
नेपालगञ्ज उपमहानगरपालिका–२० राँझाका ४७ वर्षीय लोकबहादुर बंसीको उपचारका क्रममा नेपालगञ्ज नरसिंह होममा बिहीबार दिउँसो १२: ४० बजे मृत्यु भएको बाँकेका निमित्त प्रहरी प्रवक्ता प्रहरी निरीक्षक यामबहादुर मगरले सेतोपाटीलाई बताए।
बंसी भे ७ प ४३४० नम्बरको मोटरसाइकलका चालक हुन्।
हुलाकी राजमार्ग अन्तरगत बिनौनादेखि अगैयातर्फ आउँदै गरेको बंसीले चलाएको भे ७ प ४३४० नम्बरको मोटरसाइकल र विपरीत दिशातर्फ जाँदै गरेको राप्ती सोनारी गाउँपालिका–६ फत्तेपुरका २५ वर्षीय राधेश्याम थारुले हाँकेको भे १२ प ८४२० नम्बरको मोटरसाइकल दिउँसो १२ बजेतिर राप्ती गाउँपालिका–४ धामपुर बर्काटोलमा आपसमा ठोक्किएका थिए।
दुर्घटनामा परेका राधेश्याम थारूको अवस्था पनि गम्भीर रहेको प्रहरी निरीक्षक मगरले बताए।
उनको पनि नेपालगञ्ज नरसिंह होममा उपचार जारी छ।
घटनाबारे अनुसन्धान हुन बाँकी रहेको प्रहरीले जानकारी दिएको छ।
