मुस्ताङको थसाङ गाउँपालिका वडा नम्बर २ कोबाङमा हिमपहिरोबाट थुनिएको खोला बग्न थालेको छ।
कोबाङका वडा सदस्य समेत रहेका स्थानीय भीमप्रसाद थकालीका अनुसार खोलामा हिउँका ढिक्कासहितको पानी बगिरहेको छ।
‘साविकको बहाव त छैन। तर बरफका ढिक्कासहितको पानी बग्न थालेको छ। हामीले जोखिम हुँदै गएको हो कि भन्ने अनुमान गरेका छौं,’ उनले भने।
थुनिएको घट्टे खोला हो। त्यो तल बोक्सी खोलामा आएर मिसिन्छ। बोक्सी खोला कालीगण्डकीमा मिसिन्छ।
भिडिओ:
धवलागिरि हिमशृंखलाबाट खसेको हिमपहिरो छिप्लुङसम्म आइपुगेको थियो। त्यहाँ मानवबस्ती छैन। खर्कहरू भने छन्।
यो क्षेत्र जोमसोम नपुग्दै पर्छ।
२०७८ कात्तिक २८ गते पनि कोबाङ क्षेत्रमै हिमपहरो गएको थियो। गाउँपालिकाका प्रवक्तासमेत रहेका गौतम शेरचनले हिमपहिरोको प्रकृत्ति तीन वर्षअघिको जस्तो नरहेको उनले बताए।
‘त्यतिबेला हिउँ धेरै हुने समयमा पहिरो खसेको थियो। अहिले त्यस्तो अवस्था त छैन। तर घट्टे खोला थुनिएकाले चुनौती थपिएको हो। प्रमुख जिल्ला अधिकारी, तीनवटै सुरक्षा निकाय बोक्सीखोला पुगिसक्नुभएको छ। स्थानीयलाई सतर्क रहन भनिसक्नुभएको छ। उहाँहरू सुरक्षित हुनुहुन्छ,’ उनले भने।
मुस्ताङ लेतेको दिउँसो साढे तीन बजेको तापक्रम १७.२८ रहेको जल तथा मौसम विज्ञान विभागले जानकारी दिएको छ।
यो पनि: थसाङ हिमपहिरोले थुनिएको घट्टेखोला अझै खुलेन (तस्बिरहरू)