मधेस प्रदेशका स्वास्थ्य तथा जनसंख्या मन्त्री सत्रुधन प्रसाद सिंह र सचिव डा. प्रमोद यादवले कार्यालयमा पुगेरै हस्तक्षेप गरेपछि मधेस प्रदेशको जनस्वास्थय प्रयोगशालाको विवाद साम्य भएको छ।
निमित्त निर्देशकको हाजिरी र निवर्तमान निर्देशकको रमानाको विषयमा विवाद हुँदा प्रयोगशालामा आइतबार दुई पक्षबीच धक्कामुक्की भएको थियो ।
गत साउन २० गते प्रदेश सरकारले प्रयोगशालाको निर्देशकलाई पदबाट हटाउने निर्णय गरेको थियो।
मुख्यमन्त्री कार्यालयले उनलाई हटाएको २४ घण्टाभित्र बरबुझारथ गरेर सरुवा भएको ठाउँमा जान निर्देशन दिएको थियो।
उनलाई हटाएर गत साउन २५ गते मृत्युन्जयप्रसाद यादवलाई निमित्त प्रमुखको जिम्मेवारी तोकेको थियो।
आइतबार निमित्त निर्देशक यादव आफु समर्थक कर्मचारी र एमाले कार्याकर्तासहित कार्यालयमा पुग्दा काज सरुवा समेत भइसकेका निर्देशक डा. श्रवण मिश्र र उनका सहयोगीबीच तनाव उत्पन्न भएको थियो।
त्यस क्रममा दुवै पक्षबीच धकेलाधकेल भएको हो। मिश्र आफै कार्यकक्षमा बसेर कर्मचारीबाट भवनको मूल ढोकामा ताल्चा लगाएर निमित्त प्रमुख यादवलाई कार्यालय पस्न अवरोध गरेपछि दुबै पक्षबीच विवाद भएको थियो।
बाहिरको गुण्डा लिएर कार्यालयमा आउँदा सेवा प्रभावित हुने देखेर मूलगेटमा ताल्चा लगाएको मिश्रको दाबी छ।
संघको एघारौं तहका कर्मचारी मिश्रलाई संघको स्वास्थ्य तथा जनसंख्या मन्त्रालयले २० असारमै दरबन्दी रहेको अस्पताल कोशीमा काज फिर्ता गरेको थियो। एघारौं तहका प्रमुख ल्याब टेक्नोलोजिस्ट प्रमुख मिश्र १८ साउन २०७७ मा निर्देशक भएर प्रयोगशालाको जिम्मेबारी सम्हालेका थिए ।
त्यस यता उनको दुईपटक सरुवा भयो, तर उच्च अदालतको रिटबाट पुनः यथास्थितिमै पदस्थापन भइ बसिरहेका छन्। मिश्रले आफूलाई काज सरुवा भएको पत्र स्वास्थ तथा जनसंख्या मन्त्रालयबाट प्राप्त नभएको र २० गते मुख्यमन्त्री कार्यालयले २४ घण्टे अल्टिमेटम पाएपछि मात्र आफ्नो सरुवाको जानकारी भएको दावी गरे।
‘२४ घण्टा भित्रै बरबुझारथ गरी जानुपर्ने कानुमा कतैपनि उल्लेख छैन । त्यसको २० दिन भित्र जान सकिन्छ । म जान तयार थिएँ । तर कार्यालयका कर्मचारीहरुले यति चाँडो नजानुस् । प्रयोगशालाको लागि यति काम गर्नुभएको छ। २० दिन समयछ भनेपछि अलि पर्खेको हुँ,’ मिश्रले पत्रकार सम्मेलान गरी भने, ‘म आफै गइहाल्थे । जनताको लागि दिनरात मिहिनेत गरेर प्रदेश सरकारको उदाहणीय प्रयोगशाला बनाएको मलाई यस्तो गर्छ भन्ने थाहा थिएन ।’
विवादपछि स्वास्थयमन्त्री सिंह र सचिव यादवले करिब तीन घन्टा बसेर निमित्त निर्देशकलाई हाजिर गराएका थिए । कागजी प्रक्रिया पुरा गरी निमित्त निर्देशक यादवलाई कार्यालयको जिम्मा लगाएका थिए।
मिश्रले चार वर्षदेखि मनपरि गरेर प्रयोगशाला चलाएको र भ्रष्टाचार गरेको निमित्त निर्देशक पक्षधर कर्मचारीको आरोप छ।
