प्रधानमन्त्री केपी शर्मा ओलीले सौर्य एयरलाइन्स जहाज दुर्घटनाबारे जानकारी लिएका छन्।
विमान दुर्घटनास्थल अवलोकनपछि प्रधानमन्त्री केपी शर्मा ओलीले बुधबार त्रिभुवन अन्तर्राष्ट्रिय विमानस्थलमा नागरिक उड्ययन प्राधिकरणको उद्धार समन्वय केन्द्रमा ब्रिफिङ लिएका हुन्।
प्रधानमन्त्री ओलीले घटना ज्यादै दु:खद, हृदयविदारक र अकल्पनीय भएको बताए।
यसबारे गर्नुपर्ने थप कामबारे सरकारले आवश्यक निर्णय लिने बताउँदै प्रधानमन्त्री ओलीले आउँदा दिनमा यस्ता घटना नहोस् भन्नेतर्फ सजग हुन सम्बन्धित निकाय र पक्षलाई निर्देशन दिएका छन्।
उनले घटना कसरी भयो? मानवीय वा प्राविधिक कमजोरी भयो? भन्ने बुझ्न आग्रह गरेका थिए।
ब्रिफिङमा गृहमन्त्री रमेश लेखक, पर्यटनमन्त्री बद्री पाण्डे, कायममुकायम मुख्यसचि लीला गड्तौलालगायत सहभागी थिए।
बुधबार बिहान ११:११ बजे काठमाडौंको त्रिभुवन अन्तर्राष्ट्रिय विमानस्थलबाट उडेको सौर्य एयरलाइन्सको जहाज केहीबेरमै दुर्घटनामा परेको हो।
दुर्घटनाको विषयमा छलफल र निर्णय गर्नका लागि बुधबार साँझ ५ बजे आकस्मिक बैठक बोलाइएको छ। बैठकले छानबिन समिति बनाउने सम्भावना छ।
सौर्यको ९ एन-एएमई/सीआरजे २०० कलसाइनको जहाज काठमाडौंबाट पोखरा उडेको थियो। तर उडेको केही बेरमै दुर्घटनामा परेको हो।
रनवे ०२ तर्फबाट उडेको जहाज रनवे २० नजिकै पूर्वतर्फ दुर्घटनामा परेको नेपाल नागरिक उड्डयन प्राधिकरणले जनाएको छ।
विमानमा चालक दलका सदस्यसहित १९ जना थिए। यसमध्ये १८ जनाको मृत्यु भएको नेपाल नागरिक उड्डयन प्राधिकरणले जनाएको छ। तीमध्ये १७ जना नेपाली र एक विदेशी हुन्।
अधिकांश सौर्य एयरलाइन्सका कर्मचारी रहे पनि केही परिवारका सदस्य पनि जहाजमा थिए।
दुर्घटनामा परी घाइते भएका क्याप्टेन मनीष शाक्यको उपचारका लागि केएमसी अस्पताल लगिएको छ।