राप्ती प्रादेशिक अस्पताल तुलसीपुर दाङले आजदेखि सेवाग्राहीसँग भर्नादेखि बेडसम्मको शुल्क लिन सुरू गरेको छ।
यो अस्पतालले नयाँ बिरामी दर्ताका लागि २० रुपैयाँ, पुनःदर्ता गर्नुपरे १० रुपैयाँ, बिरामी भर्ना गर्नुपरे १०० रुपैयाँ र बेडको चार्ज पनि १०० रुपैयाँ लिन सुरु गरेको अस्पतालका प्रशासन शाखाका प्रमुख रश्मिराज अधिकारीले बताए।
सेवाग्राहीबाट सेवा शुल्क लिन लागेकोबारे अस्पताल प्रशासनले सार्वजनिक सूचना नै जारी गरेको थियो।
यसअघि विगत दुई वर्षसम्म यी सबै सेवाका लागि बिरामीले अस्पताललाई पैसा तिर्नु पर्दैन थियो। अहिले किन बिरामीबाट पैसा लिन थालिएको हो?
प्रशासन प्रमुख अधिकारीकाअनुसार लुम्बिनी प्रदेश सरकारले अस्पतालाई यसअघि दिँदै आएको सोधभर्ना रोकेपछि बिरामीबाट टिकट काट्नेदेखि भर्ना र बेड चार्जसमेत उठाउनु पर्ने परिस्थिति उत्पन्न भएको बताए।
दाङ क्षेत्र नं. १ का नेकपा माओवादी केन्द्रका नेता इन्द्रजित थारु प्रदेशको स्वास्थ्य मन्त्री भएको समयमा प्रदेश सरकारले राप्ती प्रादेशिक अस्पताल तुलसीपुर र लुम्बिनी प्रादेशिक अस्पताल बुटवललाई सोधभर्ना दिने निर्णय गरेको थियो। त्यो निर्णयको दुई वर्षसम्म प्रदेश सरकारले यी दुई अस्पतालहरूलाई सोधभर्ना बापतको रकम पनि उपलब्ध गराएको थियो।
तर, राप्ती प्रादेशिक अस्पताल तुलसीपुरले सोधभर्ना बापत पाउनुपर्ने ४८ लाख रुपैयाँ गएको आर्थिक वर्षमा पाएन। चालु आर्थिक वर्षका लागि पनि प्रदेश सरकारले आफ्नो बजेटमा सोधभर्नाको व्यवस्था हटाएको हुँदा अस्पताल विकास समिति बाध्य भई सेवाग्राहीबाट भर्ना हुँदादेखि बेडसम्मको शुल्क उठाउन बाध्य हुनु परेको प्रशासन शाखाका प्रमुख अधिकारीले बताए।
त्यही भएर साउन १ गतेदेखि नै लागू हुने गरी राप्ती प्रादेशिक अस्पताल तुलसीपुर र लुम्बिनी प्रादेशिक अस्पताल बुटवलले बहिरंग सेवा तथा जनरल वार्डमा सेवाग्राहीबाट शुल्क लिन सुरू गरेका हुन्।
लुम्बिनी प्रादेशिक अस्पतालले मंगलबार सूचना जारी गर्दै सेवालाई सशुल्क गरिएको उल्लेख गरेको छ।
बुटवल अस्पतालमा आजदेखि ओपिडी सेवाका लागि ३० रुपैयाँ र पुनः दर्ताका लागि १५ रुपैयाँ र जनरल बेडका लागि पनि सेवाग्राहीले प्रतिदिन ३० रुपैयाँ तिर्नुपर्ने नियम लागू गरेको छ।
