ललितपुरको गेष्ट हाउसमा एक युवक मृत भेटिएका छन्।
आइतबार बिहान साढे ११ बजे ललितपुर महानगरपालिका वडा नम्बर १७ स्थित ललितपुर गेष्ट हाउसको ११ नम्बर कोठामा एक युवक मृत भेटिएको जिल्ला प्रहरी परिसर ललितपुरका एसपी नरेशराज सुवेदीले जानकारी दिए।
मृतक सोलुखुम्बुका २१ वर्षीय जीवन निरौला छन्।
आइतबार बिहान ११ बजेसम्म पनि ढोका नखोलेपछि गेष्ट हाउस सञ्चालक तामाङले झ्याल खोलेर हेरेका थिए।
झ्यालबाट हेर्दा घोप्टो परेको अवस्थामा फेला परेको एसपी सुवेदीले बताए।
उक्त खबरपछि प्रहरी वृत्त सातदोबाटोका डिएसपी चित्रबहादुर भट्टराईको कमाण्डमा टोली खटिएको थियो।
घटनास्थलको मुचुल्का गरी शव पोष्टमर्टमको लागि टिचिङ पठाएको छ। घटनास्थलबाट प्रहरीले लागु औषधको एम्पुल फेला पारेको छ। उनी लागु औषध सेवनकर्ता हुन सक्ने प्रहरीको अनुमान छ।
थप अनुसन्धान र पोष्टमर्टमबाट खुल्ने एसपी सुवेदीले बताए।
