अविरल वर्षाका कारण काठमाडौं उपत्यकासहित देशभरि नै विभिन्न धनजनमा क्षति पुर्याएको छ।
शुक्रबार रातिदेखि परेको वर्षाका कारण बाढी, पहिरोका कारण मानवीय एवं भौतिक क्षति पुर्याएको छ।
विभिन्न ठाउँमा मनसुनजन्य विपद् प्रतिकार्यका लागि प्रहरीहरूलाई तयारमा राखिएको छ।
शनिबार राति ९:२० मा काठमाडौं महानगरपालिका-७ गोपिकृष्ण चोकबाट चाबहिल गंगाहिटी टोल प्रवेशद्वारमा हावाहुरीका कारण रूख ढलेको थियो।
५० फिट अग्लो रूख बा १ ज ८१३४ नम्बरको ट्याक्सीमाथि ढलेको विपद् व्यवस्थापन कार्यालय सामाखुसीले जनाएको छ।
रूख ढलेपछि सडक पनि अवरूद्ध बनेको थियो। रूख ढल्दा ट्याक्सीमा आंशिक क्षति पुगेको थियो। बिजुलीको तारमा समेत क्षति पुगेको थियो। ट्याक्सी चालक भने सकुशल छन्।
उक्त खबरपछि विपद् व्यवस्थापन कार्यालयबाट प्रहरी निरीक्षक डबलबहादुर बमको कमाण्डमा २५ जनाको टोली खटिएको थियो।
विपदको आवश्यक उद्धार सामग्रीसहित खटिएको उक्त टोलीले रूखलाई काटेर सडकबाट पन्छ्याएको थियो।
मध्यराति साढे १ बजेतिर उक्त टोलीले सडक खुलाएर फर्किएको थियो।
विभिन्न ठाउँमा विपदका घटना हुनसक्ने भएकाले प्रहरीको विपद व्यवस्थापनको ६० जनाको टोलीलाई तैनाथ राखिएको प्रमुख एवं एसएसपी तारा थापाले जानकारी दिइन्।
‘६० जनाको टोली स्ट्याण्डबाइ राखेका छौं। अन्य प्रहरी पनि तयारी अवस्थामै छन्। आवश्यकता अनुसार खटाउने तयारी छ,’ उनले भनिन्।
आइतबार अहिलेसम्म काठमाडौंमा विपदका घटना नभएको पनि उनले बताइन्।
तस्बिरहरू:
सबै तस्बिर: विपद व्यवस्थापन कार्यालय सामाखुसी