ललितपुरमा एक जना व्यवसायीमाथि खुकुरी प्रहार घटनामा संलग्न व्यक्तिले आत्मसमर्पण गरेका छन्।
असार ७ गते दिउँसो १२:४५ बजे ललितपुर महानगरपालिका-९ छेडामा ४० वर्षीय मनोज कुमार बानियाँमाथि खुकुरी प्रहार भएको थियो। उनीमाथि खुकुरी प्रहार गरेको घटनामा संलग्न ललितपुरको भैसेपाटी बस्ने राजेन्द्र केसीले आत्मसमर्पण गरेका हुन्।
उनीमाथि ज्यान मार्ने उद्योग सम्बन्धी कसुरमा ८ दिन म्याद थप गरी अनुसन्धान गरिरहेको जिल्ला प्रहरी परिसर ललितपुरका एसपी नरेशराज सुवेदीले जानकारी दिए।
यस घटनामा संलग्न अन्य व्यक्तिहरू अझै फरार छन्। प्रहरीले उनीहरूको पहिचान खुलाइसकेको छ।
‘हाम्रो हिरासतमा एक जना मात्रै छन्। अन्य व्यक्तिहरूको पहिचान खुलिसकेको छ। हामी खोज्दै छौं,’ एसपी सुवेदीले भने।
बानियाँले छेडामा बतासे कटेज सञ्चालनका लागि संरचना निर्माण गर्दै थिए। जग्गा सम्बन्धी विवादका कारण खुकुरी प्रहार भएको हुनुपर्ने प्रहरीको प्रारम्भिक अनुमान थियो। यसबारे प्रहरीले थप अनुसन्धान अघि बढाएको छ।
फरार रहेका व्यक्तिको खोजीका लागि काठमाडौं उपत्यका अपराध अनुसन्धान कार्यालयको टोली पनि खटिएको छ।