पछिल्लो चौबिस घन्टामा एक दुई स्थानमा अति भारी वर्षा भएको छ।
मौसम पूर्वानुमान महाशाखाका अनुसार चौबिस घन्टामा सबैभन्दा बढी पानी बागलुङको गलकोटमा परेको छ।
त्यहाँ चौबिस घन्टाको अवधीमा २२७ मिलिमिटर वर्षा मापन भएको छ।
मौसमको शब्दावलीमा यसलाई अति भारी वर्षा भनिन्छ।
१० मिलिमिटरसम्मको वर्षालाई हल्का, १०-५० मिलिमिटरसम्मको वर्षालाई मध्यम, ५०-१०० मिलिमिटरसम्मको वर्षालाई भारी, १०० देखि २०० मिलिमिटरसम्मको वर्षालाई धेरै भारी र २०० मिलिमिटरभन्दा बढी पानी पर्यो भने अति भारी वर्षा भनिन्छ।
त्यस्तै रूकुमको मुसिकोटमा पछिल्लो चौबिस घन्टामा १९० मिलिमिटर, स्याङ्जामा १४९.२ मिलिमिटर, स्याङ्जाकै पञ्चमुलमा १३२.४ मिलिमिटर, अर्घखाँचीमा १३३ मिलिमिटर, गुल्मीमा १२९.८ मिलिमिटर र दाङको कबिलासमा १२५.२ मिलिमिटर वर्षा भएको महाशाखाले जनाएको छ।
शनिबार दिउँसो पनि भारी कोशी, बागमती र गण्डकी प्रदेशका एक-दुई स्थानमा धेरै भारी वर्षाको सम्भावना रहेकोले ती क्षेत्रमा हुन सक्ने गेग्रान बहाव, बाढी, पहिरो तथा भू-क्षयका जस्ता प्रकोपको जोखिम रहेको महाशाखाले जनाएको छ।
उक्त जोखिमबाट बँच्न तथा दैनिक जनजीवन लगायत कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक असर पर्ने सम्भावना रहेकोले आवश्यक सतर्कता अपनाउन पनि महाशाखाले अनुरोध गरेको छ।