देशभर मनसुन फैलिएसँगै बाढी पहिरोजस्ता विपदका घटना भएका छन्।
नेपालमा जेठ २८ गते नै मनसुन भित्रिएको थियो। मनसुन भित्रिएपनि देशभर नफैलिँदा पानी भने पर्न सकेको थिएन।
मनसुन देशैभर फैलिएपछि पछिल्लो २४ घण्टामा केही ठाउँमा भारीवर्षा पनि भएको छ। सुदूरपश्चिम, गण्डकी, बागमती र मधेसका केही ठाउँमा वर्षा भइरहेको छ।
चट्याङ, बाढी, पहिरो र आगलागीका घटनाले मानवीय तथा भौतिक भएको छ। विपदका घटनामा उद्धार र खोजीका लागि नेपाल प्रहरी, सशस्त्र प्रहरी र स्थानीय बासिन्दा खटिएका छन्।
नेपाल प्रहरीका सहप्रवक्ता एसएसपी विश्व अधिकारीका अनुसार पछिल्लो २४ घण्टामा देशभर ४४ वटा विपदका घटना भए। यो विवरण मंगलबार बिहान ९ बजेदेखि बुधबार बिहान ९ बजेसम्मको विवरण हो।
विपदबाट देशभर १० जनाको मृत्यु भएको छ। ९ जना घाइते र ६ जना बेपत्ता छन्। विभिन्न ठाउँमा भएको यो घटनामा बेपत्ताको खोजी कार्य जारी छ।
देशभर आगलागीका चार वटा घटना भएका छन्। यसबाट मानवीय क्षति भएको छैन। एउटा घरमा भने क्षति पुगेको छ।
पछिल्लो २४ घण्टामा देशभर १८ ठाउँमा पहिरो गएको छ। पहिरोबाट मात्रै चार जनाले ज्यान गुमाएका छन्। तीन जना घाइते र चार जना बेपत्ता छन्।
लमजुङको बेसीशहर नगरपालिका वडा नम्बर ११ चितिका १६ वर्षीय विकल सुनार र क्व्होलासोथार गाउँपालिका वडा नम्बर ३ बगुमका रुद्रमान गुरुङको मृत्यु भएको हो।
बुधबार बिहान नै कास्कीको मादी गाउँपालिका वडा नम्बर ५ चितेपानीमा पहिरोले घर नै बगाएको छ। घर बगाउँदा १३ वर्षीया आयुष्मा रानाभाटको मृत्यु भएको हो।
पोखरा महानगरपालिका वडा नम्बर २७ आरूपाटामा पनि पहिरोले घर भत्काउँदा ३ वर्षीय अनमोल सुनारको मृत्यु भएको हो। पहिरोले विभिन्न ठाउँका ६ वटा घर र एउटा गोठमा क्षति पुगेको छ। पहिरोमै परी ९ वटा चौपाय समेत मरेका छन्।
त्यसैगरी चट्याङले पनि मानवीय क्षति पुर्याएको छ। देशभर चट्याङका १३ वटा घटना भएको एसएसपी विश्व अधिकारीको भनाइ छ। चट्याङकै कारण ५ जनाको मृत्यु भएको छ। ५ जना मानिस घाइते भएका छन् भने ५ वटा चौपाया मरेका छन्।
कैलालीमा बुधबार बिहान खेतमा काम गरिरहँदा चट्याङ लागेर दुई जनाको मृत्यु भएको छ। जोशीपुर गाउँपालिका वडा नम्बर ३ भितरीका ३२ वर्षीय जयराम डंगौराको मृत्यु भएको हो।
साथै धनगढी उपमहानगरपालिका वडा नम्बर १८ का २७ वर्षीय सालीन चौधरीको पनि चट्याङ लागेर मृत्यु भएको थियो। मंगलबार नै झापामा पनि चट्याङ लागेर दुई जनाले ज्यान गुमाएका थिए।
त्यस्तै भारी वर्षापछि आएको बाढीका कारण विभिन्न बस्ती जलमग्न भएको छ। बाढीले एक जनाको मृत्यु र दुई जना बेपत्ता छन्।
मंगलबार दिउँसो माछा मार्न जाँदा मोरङको सुन्दरहरैँचा नगरपालिका वडा नम्बर ५ का एकै परिवारका चार जनालाई बगाएको थियो। जसमध्ये २२ वर्षीया प्रेमकला चौधरीको शव फेला परेको थियो भने दुई जना अझै बेपत्ता छन्।
