चितवनको कालिका नगरपालिकाले नगरलाई रासायनिक विषादीमुक्त बनाउने नीति लिएको छ।
बुधबार नगरपालिकाको दोस्रो कार्यकालको पाचौं नगर सभामा मेयर विनोद रेग्मीले प्रांगारिक उत्पादन गर्नेलाई सघाउने र रासायनिक विषादी प्रयोग निरूत्साहित गर्ने नीति लिइएको बताए।
रासायनिक विषादी र मलको विकल्पमा जैविक विषादी र प्रांगारिक मल प्रोत्साहन गर्ने नीति नगरपालिकाको छ।
'अर्गानिक खेती प्रवर्द्धन गर्न प्रांगारिक मल, झोल मल र भर्मी कम्पोस्ट मल बनाई प्रयोग गर्ने किसनालाई अनुदान तथा प्राविधिक सहायता प्रदान गरिनेछ,' मेयर रेग्मीले भने, 'कालिकाको शान, विषादीमुक्त खानपान भन्ने नाराका साथ आफू खान र अरूलाई पनि विषादीरहित खुवाउन रासायनिक मल खपत क्रमशः घटाउँदै प्रांगारिक मल प्रयोग गरी खेती गर्न प्रोत्साहित गरिनेछ।’
कालिका नगरपालिकामा तरकारी र केराको उत्पादन राम्रो हुन्छ। साथै कोदो, फापर, अदुवा, हलेदो, पिँडालु लगायत रैथाने बाली उत्पादनमा प्रोत्साहन गर्न बीउमा अनुदान दिने व्यवस्था गर्ने उनले बताए।
साथै नगरपालिकाले विपन्न परिवारको स्वास्थ्य बीमालाई प्राथमिकतामा राखेर नीति तथा कार्यक्रम ल्याएको छ।
मेयर रेग्मीले यस आर्थिक वर्षमा नौ सय विपन्न परिवारको स्वास्थ्य बीमा गरिएको जानकारी गराए। आगामी आर्थिक वर्षमा १५ सय बढी परिवारको बीमा गर्ने लक्ष्य रहेको उनले बताए। यो कार्यक्रम सञ्चालन गर्न नगर प्रमुख स्वास्थ्य बीमा कोष स्थापना गर्ने तयारी नगरपालिकाको छ।
'हाम्रो नगरपालिकाको पहाडी क्षेत्रमा प्रायः विपन्न परिवार छन्। तल्लो क्षेत्रमा पनि धेरै विपन्न परिवार छन्। उनीहरूलाई सहज रूपमा स्वास्थ्य सेवा उपलब्ध गराउन स्वास्थ्य बीमालाई प्राथमिकतामा राखिएको हो,' मेयर रेग्मीले भने।
नीति तथा कार्यक्रममा आर्थिक तथा सामाजिक रूपले पछाडि परेका बालबालिकालाई विद्यालय आउने वातावरण बनाउन, टिकाउन, सिकाउन र पेसामा बिकाउन 'मेयर केयर कार्यक्रम' अघि सारेको छ। यो कार्यक्रम अन्तर्गत विद्यालयमा बालबालिकालाई छात्रवृत्ति, शैक्षिक सामग्री, पोशाकहरू उपलब्ध गराइने छ।
चेपाङ समुदायको बाहुल्यता रहेको पहाडी क्षेत्रमा फलफूल उत्पादन, पर्यटन, महिलाहरूलाई जीविकोपार्जन सम्बन्धी तालिम र पूर्वाधार विकासलाई प्राथमिकतामा राखेर नीति तथा कार्यक्रम ल्याएको मेयर रेग्मीले बताए।
नगरपालिकाले आगामी आर्थिक वर्षका लागि ८७ करोड ७८ लाख ८१ हजार रूपैयाँको बजेट प्रस्ताव गरेको छ।
