जिल्ला प्रहरी कार्यालय बाँकेले जेठ महिनामा मात्रै एक करोड १७ लाख ३१ हजार ८९० रुपैंया बराबरको भन्सार छलीका सामान बरामद गरेको छ।
बाँके प्रहरीले पछिल्लो एक महिनामा अवैध भन्सार छलिका सामानदेखि बालुवा गिट्टीको चोरी तस्करी नियन्त्रणमा तीब्रता दिएको छ।
जेठ महिनामा प्रहरीले एउटा चोरीको माइक्रो बस, एउटा बोलेरो गाडी र चोरीका सात वटा मोटरसाइकल नियन्त्रणमा लिएको छ।
त्यस्तै नदी जन्य पदार्थको अवैध दोहनमा संलग्न पाँच वटा जेसिबी, ६ वटा टिपरलाई आवश्यक कारबाहीका लागि सम्बन्धित निकायमा पठाइएकोमा एक लाख ४५ हजार जरिवाना असुल उपर भएको बाँकेका प्रहरी प्रमुख एसपी तुलबहादुर कार्कीले बताए।
ट्राफिक कारबाही तर्फ एक हजार ७१३ वटा सवारी साधनलाई कारबाही गर्दा जेठ महिनामा मात्रै १४ लाख ६१ हजार ५ सय राजश्व संकलन भएको छ। त्यस्तै सवारी धनी नखुलेका १२१ वटा मोटरसाइकल र स्कुटर लिलाम गरी ६ लाख १२ हजार राजश्व संकलन भएको एसपी कार्कीले जानकारी दिए।
अवैध रुपमा भारतबाट ल्याएको दुई लाख ५८ हजार बराबरको १९५ किलो ब्रोइलर कुखुराको मासु र १८ सय वटा चल्ला आवश्यक कारबाहीका लागि पशु क्वारेन्टाइन कार्यालय नेपालगञ्जमा पठाइएको प्रहरीले जानकारी दिएको छ।
जेठ महिनामा बाँके प्रहरीमा १७२ वटा मुद्दा दर्ता भएकोमा १२७ जना व्यक्तिलाई पक्राउ गरी कानुनी कारबाही गरिएको छ।
त्यस्तै थप ६३ वटा मुद्दा पेन्डिङ मुद्दाहरु जेठ महिनामा फर्छ्यौट गरिएको छ।
जेठ महिनामा ४४ जना फरार प्रतिवादी पक्राउ गरिएको र त्यसबाट १८ बर्ष २ महिना २९ दिन कैद र २३ लाख ७९ हजार दुइ सय ७४ रुपैंया राजश्व संकलन भएको छ।
जेठ महिनामा बाँके प्रहरीमा ४९९ वटा ठाडो उजुरी आएकोमा ३५१ फर्छ्यौट भएका, १५ वटा सम्बन्धित निकायमा पठाइएको तथा थप १३३ वटा फर्छ्यौट गर्न बाँकी रहेको मुद्दा शाखाले जानकारी दिएको छ।
जेठ महिनामा चोरीका ७ वटा मोवाइल सेट फेला पारेर सम्बन्धित ब्यक्तिलाई प्रदान गरिएको, मोटरसाइकल चोरीमा संलग्न चार जना मानिस ९ वटा मोटरसाइकलसहित पक्राउ गरिएको र स्कुटर चोरी गर्ने थप दुई जनालाई स्कुटरसहित पक्राउ गरिएको एसपी कार्कीले जानकारी दिए।
जेठ महिनामा बाँके प्रहरीमा महिला तथा बालबालिकाका सम्बन्धी ११ मुद्दा दर्ता भएकोमा तीन वटा मुद्दामा आरोपीलाई पक्राउ गरी कानुनी दायरमा ल्याइएको छ।
त्यस्तै घरेलु हिंसा सम्बन्धी ६१ उजुरी परेकोमा ३१ वटा फर्छ्यौट भइ सकेको र बाँकी अनुसन्धान तथा कारबाहीको प्रक्रियामै रहेको एसपी कार्कीले बताए।
महिला, बालबालिका र जेष्ठ नागरिक सम्बन्धि हराएका ९ वटा निवेदन परेकोमा तीन जनालाई फेला पारेर अभिभावकको जिम्मा लगाइएको थियो।
ट्राफिक सचेतना तर्फ २३० वटा सचेतनामूलक कार्यक्रम गरेको, समुदाय प्रहरी सहकार्य अन्तर्गत गरिएका ५२ वटा कार्यक्रम मध्य सात वटा आत्महत्या न्यूनिकरण, १५ वटा लागुऔषधविरूद्ध सचेतना र ६ वटा अल्पसंख्यकसंग प्रहरी कार्यक्रम गरिएका थिए।
नेपालगञ्ज उपमहानगरपालिका संगको सहकार्यमा लागु औषध दुब्र्यशन तथा ओसार पसार बिरुद्ध एकीकृत अिभयान २०८१ संचालन गरिएको छ।
जसअन्तर्गत ११ स्थानमा चेतनामुलक होडिङ बोर्ड, फुटसल प्रतियोगिता, कक्षा ९ र १० का बिद्यार्थीबीच निबन्ध लेखन प्रतियोगिता, सडक नाटक पर्दशनका साथै जमुनाहा नाका र विमानस्थलमा डग स्निफिङ कार्य गरिएको एसपी तुलबहादुर कार्कीले जानकारी दिए।
त्यस्तै प्रहरी चौकी बेतहनी बाँकेलाई २०८१ जेठको उत्कृष्ट प्रहरी इकाइ घोषणा गरी सम्मान गरिएको थियो भने आचरण विपरीत काम गर्ने एक जना प्रहरीलाई विभागीय कारबाही गरिएको र दुई जना प्रहरीलाई जिम्मेवारीबाट हटाइएको एसपी कार्कीले जानकारी दिए।