लामो समय भाडाका भवनहरुबाट कार्यालय सञ्चालन गर्दै आएको चितवनको कालिका नगरपालिकाले आफ्नै सुविधासम्पन्न प्रशासनिक भवन निर्माण गरेको छ।
नगरपालिकाका मेयर विनोद रेग्मीले रेडक्रसग्राममा ५३ कोठाको भवन यही असार मसान्तसम्ममा उद्घाटन गर्ने बताए।
आफ्नो भवन नहुँदा कालिका नगरपालिकाका कामहरु ५ वटा छुट्टाछुट्टै घरहरुबाट हुँदै आएको थियो।
अहिले पनि मुख्य कार्यालय, संघसंस्था, उद्योग, आइटी, स्टोर शाखाहरु छुट्टाछुट्टै भाडाका घरबाट सञ्चालन भएका छन्।
कृषि तथा पशुपंक्षी शाखा वडा नम्बर ६ को कार्यालयबाट सञ्चालन गरिएको छ। भाडामा बसेबापत नगरपालिकाले मासिक एक लाख रुपैयाँभन्दा बढी रकम बुझाउनुपरेको छ।
मेयर रेग्मीले १ विघा चार कट्ठा २ धुर जमिनमा तयार भएको नयाँ भवनमा सरेसँगै नगरपालिकाको सेवाहरुमा सहज हुने बताए।
‘हाम्रो नगरपालिकामा निकै विकट ठाउँहरु छन्। चेपाङ समुदायको बसोबास धेरै भएका पहाडी गाउँहरु पनि छन्। नयाँ भवनमा सरेपछि नगरपालिकाको सेवा लिन आउनेहरुलाई धेरै ठाउँमा धाउन पर्दैन,’ रेग्मीले भने।
यो भवन ११ करोड ६१ लाख ४ हजार ३३ रुपैयाँमा २०७६ सालको फागुनमा ठेक्का लागेको थियो।
१८ महिनाभित्रमा भवन निर्माण गरिसक्नेगरी सम्झौता भएपनि केही समयमै कोरोना महामारी सुरु भएपछि निर्माणमा असर परेको थियो।
जिल्ला समन्वय समितिको २ करोड र बाँकी रकम नगरपालिकाको अन्तरिक स्रोतबाट खर्च गरेर भवन निर्माण गरिएको हो। समितिले निर्माण सुरु गर्नुअघि ६० र सकिएपछि ४० प्रतिशत रकम दिनेगरी २ करोड रुपैयाँ प्रशासनिक भवनका लागि दिने सम्झौता गरेको थियो।
कालिका नगरपालिकोल आर्थिक वर्ष २०७९/८० मा ३ करोड ८३ लाख ५५ हजार आन्तरिक आय संकलन गरेको थियो।
कालिका नगरपालिकामा अहिले ९४ जना कर्मचारीहरु छन्। ९ जना नगर प्रहरी छन्। उनीहरुको लागि पनि नयाँ भवन नजिकै कार्यालय तयार गरिएको रेग्मीले बताए।
यहाँ पहिले माध्यामिक विद्यालय रेडक्रसग्राम थियो। भवन जीर्ण भइसकेको विद्यालयलाई अर्को ठाउँमा नयाँ भवन बनाइदिएर यो जमिन नगरपालिकाले लिएको हो।
