पोखराका सहकारी पीडितहरूले प्रधानमन्त्री पुष्पकमल दाहाल प्रचण्डको कार्यक्रममा विरोध जनाउँदा प्रहरीले कुटपिट र धरपकड गरेको छ।
बिहीबार प्रधानमन्त्री प्रचण्ड कार्यकर्ता प्रशिक्षणमा जाँदै गर्दा पोखरा सभागृह अगाडि सहकारी पीडितले विरोध प्रदर्शन गर्न खोजेका थिए।
‘प्रधानमन्त्रीलाई पटक-पटक ज्ञापन पत्र बुझाएर हाम्रो समस्या समाधान गरिदिनुस् भन्यौं, उहाँले गर्नुभएन,’ सहकारी पीडित संघर्ष समितिका संयोजक किरण श्रेष्ठले सेतोपाटीलाई भने, ‘आज हामीले शान्तिपूर्ण विरोध प्रदर्शन गर्दा कुटपिट र धरपकड भएको छ।’
सहकारी पीडितले विरोध प्रदर्शन गर्दा महिलालाई पुरुष प्रहरीले लात्ता प्रहार गरेको प्रत्यक्षदर्शीले बताएका छन्।
सभागृह गेट अगाडि घटना हेरिरहेका दीपक पौडेलले उक्त दृश्य लाजमर्दो देखिएको बताए।
‘प्रधानमन्त्रीको विरोधमा सहकारी पीडितले आन्दोलन गरेका रहेछन्, प्रहरीले कुटपिट र पक्राउ गरेको देखियो,’ उनले भने, ‘लाजमर्दौ त के भने सहकारी पीडित महिलालाई पुरुष प्रहरीले लात्तै लात्ताले हानेको देखियो।’
सहकारी पीडित संघर्ष समितिका संयोजक श्रेष्ठका अनुसार प्रहरीले लात्ताले हानेका महिला अनुराधा श्रेष्ठ हुन्। उनले सुर्यदर्शन बचत तथा ऋण सहकारी संस्थामा बचत जम्मा गरेकी थिइन्। बचत फिर्ता नपाउँदा उनीसहित पीडितहरू विगत २ वर्षदेखि आन्दोलनमा छन्।
सुर्यदर्शन बचत तथा ऋण सहकारी संस्थाबाट करोडौं रुपैयाँ गोरखा मिडिया प्रालिमा गैरकानुनी रुपमा लगिएको छ। उक्त मिडिया ग्यालेक्सी टेलिभिजनको माउ कम्पनी हो। सहकारीको पैसा लगेका बेला टेलिभिजनका प्रबन्ध निर्देशक एवं शेयर सदस्य रवि लामिछाने थिए। लामिछाने अहिले उपप्रधान तथा गृहमन्त्री छन्।
प्रधानमन्त्रीलाई कालो झण्डा देखाएर विरोध जनाउने कार्यक्रम भए पनि प्रहरीले बिथोलेको सहकारी पीडित संघर्ष समितिका संयोजक श्रेष्ठले बताए। अब आन्दोलनलाई अझ अघि बढाउने उनले बताए।
‘हामीलाई सरकारले सधैं झुलाउने काम गरेको छ। आज हाम्रा साथीहरूलाई कुटपिट गर धरपकड गरे,’ उनले भने, ‘अब हामी चुप लागेर बस्दैनौं।’
उनले विज्ञप्ति जारी गर्दै पक्राउ परेका व्यक्तिलाई तत्काल बिना शर्त रिहा गर्न र घाइतेको उपचार गर्न माग गरेका छन्।
कास्की प्रहरी प्रवक्ता डिएसपी बसन्तकुमार शर्माले शान्ति सुरक्षा कायम गर्ने क्रममा केही व्यक्ति पक्राउ परेको बताए। सहकारी पीडितको आन्दोलनमा सहभागी ११ जनालाई पक्राउ गरेको उनले बताए।
