शिक्षक, कर्मचारीहरुको निरन्तरको आन्दोलनले अस्तव्यस्त धरानस्थित बिपी कोइराला स्वास्थ्य विज्ञान प्रतिष्ठान अस्तव्यस्त छ। केही दिनयता पठनपाठन पनि प्रभावित छ।
यही अस्तव्यस्तताबीचमा आफैँ सिनेट सदस्य रहेका मेयर हर्क साम्पाङ स्वयम् तालाबन्दीमा ओर्लेका छन्।
धरानका मेयर साम्पाङले सिनेट सदस्य रहेको बीपी कोइराला स्वास्थ्य विज्ञान प्रतिष्ठानको उपकुलपतिको कार्यकक्षमा ताला लगाइदिएका हुन्।।
मेयर साम्पाङले सोमबार कायममुकायम उपकुलपति प्राडा प्रल्हाद कार्कीको कार्यकक्षमा ताला लगाउँदै ताला नखोल्न चेतावनीसमेत दिएका छन्।
अहिले बीपी प्रतिष्ठानका शिक्षक, कर्मचारीहरू आन्दोलनमा छन्। यस्तो बेलामा प्रतिष्ठानको समस्या समाधान गर्न छोडेर विदामा बसेका कामु उपकुलपति कार्कीको कार्यकक्षमा आफूले ताला लगाउनु परेको मेयर साम्पाङको भनाइ छ।
कामु उपकुलपति कार्कीले कार्यकारिणी समितिको बैठक बोलाएर विदामा बसेपछि शिक्षक, कर्मचारीहरूले उपकुलपतिलाई प्रतिष्ठानमा निषेधित क्षेत्र घोषणा गरेका छन्।
कामु उपकुलपति बनेपछि कार्कीले बढुवा प्रक्रिया रोकेको शिक्षक कर्मचारीले आरोप लगाउँदै आएका छन्।
गएको कात्तिक २० गते शिक्षक, कर्मचारीसँग छुट्टाछुट्टै सहमति भएको थियो। सो सहमति कार्यान्वयन नगरी सम्पर्कविहीन भएर बसेको भन्दै मेयर साम्पाङ र आन्दोलनकारी शिक्षक कर्मचारीले कार्कीको राजीनामा मागिरहेका छन्। यहीबेला एक्लै बाइक चढेर प्रतिष्ठान पुगेका मेयरले ताला लगाएका हुन्।
‘उहाँ एक्लै बाइक चढेर आउनुभयो र भिसी सरको कार्यकक्षमा ताला लगाउनु भयो’, प्रतिष्ठानका एक पदाधिकारीले सेतोपाटीसँग भने ‘हामीले केही प्रतिवाद गरेनौं।’
प्रतिष्ठानमा अनुपस्थित रहेकै बेला कामु उपकुलपति डा कार्कीले रजिस्ट्रार प्राडा सूर्यप्रसाद सङ्ग्रौलालाई दिएको अधिकार खोसेका छन्। उनले रजिस्ट्रारलाई पत्र पठाउदै सम्पूर्ण अधिकार फिर्ता लिएको र आफ्नो स्वीकृति विना काम नगर्न निर्देशन दिएका छन्। प्रतिष्ठानमा उपकुलपतिले अन्य पदाधिकारीलाई अधिकार प्रत्यायोजन गर्नुपर्ने नियम छ।
प्रतिष्ठानका शिक्षक र कर्मचारीहरू संयुक्त आन्दोलनमा उत्रिएपछि आइतबारदेखि ओपिडी र शैक्षिक क्षेत्र ठप्प भएको छ। बढुवाको माग लिएर प्रतिष्ठानको शैक्षिक क्षेत्र पूर्णरूपमा बन्द भएको यो तेस्रो पटक हो। यसअघिको आन्दोलनले पनि करिब डेढ महिना शैक्षिक गतिविधि रोकिँदा शैक्षिकसत्र लम्बिएको थियो। यसले विद्यार्थीहरूलाई मानसिक तनाव र आर्थिक बोझ थपिएको विद्यार्थी कल्याण समाजका अध्यक्ष डा ओम शान्ति रजकले बताए।
आन्दोलन हुँदा विद्यार्थीहरूलाई प्रत्यक्ष असर पर्ने र विद्यार्थीहरूमा नैराश्यता बढ्दो रहेको पनि अध्यक्ष डा रजकले बताए। यसैबीच सोमबार प्रतिष्ठानका विद्यार्थीहरूले शान्तिपूर्ण प्रदर्शन गरेका छन्।
कामु उपकुलपति लगायत अन्य पदाधिकारी, सम्पूर्ण सम्बन्धित निकाय र सरोकारवालाहरूको ध्यानाकर्षण गराउन उपकुलपतिको कार्यालय अगाडि धर्ना दिइएको रजकले जानकारी दिए। उनका अनुसार प्रतिष्ठानका करिब ३०० विद्यार्थीले धर्ना दिएका थिए।
पठनपाठनका सबै कार्यक्रम ठप्प पारिएपछि विद्यार्थीहरूले पाठ्यपुस्तक लिएर पढ्दै शैक्षिक बन्दको सांकेतिक विरोध गरेका थिए । विद्यार्थीहरूको समस्यालाई बुझेर शैक्षिक बन्दको कुनै न कुनै किसिमले हल निकालिदिन अनुरोध पनि गरिएको समाजले जनाएको छ। प्रतिष्ठानका शिक्षाध्यक्ष, रजिस्ट्रार र अस्पताल निर्देशकले समस्याको हल नगरी केन्द्रीय निकायबाट आफूहरू नफर्किने मौखिक प्रतिबद्धता जनाएकोले आफुहरु आशावादी रहेको अध्यक्ष रजकले बताए।
