मन्त्रिपरिषद्को निर्यणअनुसार नेपाल–भारत सीमा क्षेत्रमा रहेका सीमास्तम्भको मर्मतसम्भार र रंगरोगन गर्न थालिएको छ।
सीमा क्षेत्रका जिल्लाहरू झापा, सिरहा, धनुषा लगायत भारतसँग सीमाना जोडिएका जिल्लाका सिमास्तम्भ बुधबारदेखि मर्मतसम्भार र रंगरोगन सुरू गरिएको थियो।
सशस्त्र प्रहरी बलको नेतृत्व, भारतीय सिमा सुरक्षा बल (एसएसबी), नापी विभागका प्रतिनिधि, स्थानीय प्रशासनका प्रतिनिधि र जनप्रतिनिधहरूको उपस्थितिमा स्तम्भको रंगरोगन कार्य सुरू भएको हो।
सशस्त्र प्रहरीका सहप्रवक्ता डिएसपी शैलेन्द्र थापाका अनुसार बुधबार झापाका ५, सिरहाका ४ र धनुषामा ९ गरी बुधबार १८ वटा सिमास्तम्भ रंगरोगन गरिएको छ।
बिहीबार तीन जिल्लाका १६ स्तम्भमा रंगरोगनको कार्य भइरहेको डिएसपी थापाले जानकारी दिए।
नेपाल भारत सिमानामा राखिएको सीमा स्तम्भमध्ये जोर नम्बरको सिमा भारतीय पक्षले र बिजोर नम्बरको स्तम्भ नेपाली पक्षले रंगरोगन र मर्मतसम्भार गरिनेछ।
यसपालि सन् २०१४ पछि राखिएका सीमा-स्तम्भहरू मात्रे रंगरोगन हुनेछ। ढलेका र हराएका सिमास्तम्भ पुनःस्थापना नहुने नापी विभागका सूचना अधिकारी दामोदर ढकालले जानकारी दिए।
‘२०१४ पछि राखिएका स्तम्भमा रंगमात्रै लगाउन लागिएको हो, भत्केका हराएका स्थापना गर्ने भनिएको होइन, ‘ उनले भने।
२०१४ पछि राखिएका स्तम्भहरू ठिक ठाउँमा छ कि छैन भन्ने यकिन गर्न र अन्य प्राविधिक कार्यका लागि विभागले प्राविधिक पवनकुमार खत्रीलाई खटाएको छ।
एसएसबीको नेतृत्वमा हुने रंगरोगन कार्यमा नेपाली पक्षको पनि उपस्थिति हुनेछ।
