त्रिभुवन अन्तर्राष्ट्रिय विमानस्थलमा रहेको एउटा ल्याबले सरकारको निर्देशनविपरीत पिसिआर रिपोर्ट शुल्क लिएको पाइएको छ।
स्टार अस्पतालले सञ्चालन गर्दै आएको ल्याबले प्रतिव्यक्ति दुई हजार रूपैयाँ शुल्क उठाएको पाइएको हो।
सरकारले विमानस्थलमा रहेका निजी अस्पतालका ल्याबहरूलाई प्रतिव्यक्ति १२ सय रूपैयाँभन्दा बढी नलिन निर्देशन दिएको थियो।
विमानस्थल प्रहरीका अनुसार सोमबार स्टारमा परीक्षण स्वाब दिएका १८ जनासँग स्टारले प्रतिव्यक्ति दुई हजार रूपैयाँ लिएको हो।
यो कुरा जानकारी भएपछि प्रहरीले ल्याबबाट बढी लिएको पैसा सम्बन्धित व्यक्तिलाई फिर्ता दिलाएको विमानस्थल प्रहरी कार्यालयले जानकारी दियो।
अहिले त्रिभुवन विमानस्थलमा स्टार अस्पताल, टिजी मेडिसिन,क्रिस्टल डाइग्नोष्टिक, अल्फा हेल्थ केयर, क्लिनिकल एण्ड मोलिकुलर जेनेटिक,कोरोना ट्रेडिङ कम्पनी, सिद्धि पोलिक्लिनिक र विध ल्याबले पिसिआर परीक्षण गर्दै आएका छन्।
केही दिनअघि पर्यटन मन्त्री प्रेमबहादुर आले विमानस्थल निरीक्षण गर्न जाँदा युएई जानेहरूले पिसिआर सरकारी मूल्यभन्दा महंगो भएको गुनासो गरेका थिए। त्यसपछि मन्त्री आलेले सरकारी शुल्कमै परीक्षण गर्न निर्देशन दिएका थिए।