एग्रिकल्चर प्रालि सञ्चालन गरेर किसान ठगेको आरोपमा प्रहरीले सुनसरीबाट एक जनालाई पक्राउ गरेको छ।
पक्राउ पर्नेमा काठमाडौं बुढानिलकण्ठ-२ का ४३ वर्षीय दीपककुमार खड्का छन्।
उनी बराहक्षेत्र नगरपालिका-६ चक्रघट्टीमा बगैंचा एग्रिकल्चर प्रालि नामक संस्था सञ्चालन गरेर बसिरहेका थिए।
भोजपुर जिल्लाबाट व्यापारीले दसैंका लागि बिक्री गर्न ल्याएका २८ खसीबोकासहित २९ जना व्यापारीसँग १० लाख ९८ हजार ९९७ रुपैयाँ ठगी गरेको अभियोगमा उनलाई पक्राउ गरिएको सुनसरीका प्रहरी उपरीक्षक सञ्जयसिंह थापाले बताए।
स्थानीयको जनगुनासो तथा निवेदनका आधारमा खड्कालाई पक्राउ गरी ठगी मुद्दामा अनुसन्धान थालिएको उनले बताए।
उनलाई सात दिन थुनामा राख्न अदालतले अनुमति दिएको छ।