सुदूरपश्चिममा बाढी-पहिरोमा परी मृत्यु हुनेको संख्या २६ पुगेको छ।
प्रदेश प्रहरी कार्यालयका अनुसार आइतबार साँझदेखि अहिलेसम्म डोटीमा १३, बझाङमा ६ जना, बैतडीमा ४, डडेल्धुरामा २ र कैलालीमा १ गरी २६ जनाको मृत्यु भएको हो।
बाढी र पहिरोमा परेर अन्य ११ जना घाइते भएका छन् भने २५ जना बेपत्ता छन्।
बेपत्ता हुनेमा बझाङका थलारा गाउँपालिका डिख्लाका २१ जना, खप्तडाछान्ना गाउँपालिकाका २ र कैलालीका २ गरी २५ जना अझै बेपत्ता छन्।
बझाङमा १७, डोटीमा १२ र डडेल्धुराका ३ वटा घरमा पूर्णरूपमा क्षति समेत भएको प्रहरीले जनाएको छ।
प्रदेशका तराई भेगमा जिल्ला कैलाली र कञ्चनपुरमा पनि सयौं घरमा डुबानमा परेका छन्।
प्रदेशका पहाडी र तराईका बाढी पहिरो प्रभावित क्षेत्रका कयौं परिवार विस्थापित भएका छन्।
विस्थापित भएकालाई विद्यालय, सामुदायिक भवनमा राखिएको छ।
यस्तै प्रदेशमा ठूलो संख्यामा गाई-भैंसी, कुखुरा, बाख्रा लगायतका पशुपंक्षीमा पनि क्षति पुगेको छ।
बाढी पहिरोकै कारण प्रदेशका विभिन्न सडकखण्डदेखि झोलुङे पुलसम्म पूर्ण रूपमा क्षति पुगेको सुदूरपश्चिम प्रदेश प्रहरी कार्यालयको तथ्यांक छ।
बाढी र पहिरोका कारण डडेल्धुरा, डोटी, अछाम, बैतडी, बझाङ र दार्चुलाका मुख्य तथा शाखा सडकखण्ड अवरूद्ध छन्।
अवरूद्ध सडकखण्ड खुलाउने काम भइरहेको प्रहरीले जनाएको छ।
