काठमाडौंको टोखाबाट लागुऔषध खैरो हिरोइनसहित तीन जनालाई प्रहरीले पक्राउ गरेको छ।
महानगरीय प्रहरी परिसर काठमाडौंले सोमबार दिउँसो साढे १ बजे टोखा नगरपालिका वडा नम्बर ११ ग्रीनल्यान्ड ओमप्लाजास्थित एक घरबाट तीन जनालाई पक्राउ गरेको प्रहरी उपरीक्षक रमेश बस्नेतले जानकारी दिए।
ग्रीनल्याण्ड ओमप्लाजा बस्ने टेकनाथ न्यौपानेको चार तले घरको तेस्रो तलामा डेरा गरी बस्ने यादव कार्कीको कोठामा खैरो हिरोइनको कारोबार गरिरहेको भन्ने सूचना प्रहरीले पाएको थियो।
सोही सूचनाको आधारमा महानगरीय प्रहरी वृत्त महाराजगन्जबाट खटिएको प्रहरीको टोलीले तलासी लिएको थियो।
त्यहाँबाट प्रहरीले सिन्धुली दमौली घर भई टोखा बस्दै आएका ३५ वर्षीय यादव कार्की, महोत्तरी बर्दिबासका २० वर्षीय दलबहादुर विक र ३० वर्षीय नयन विकलाई पक्राउ गरेको हो।
उनीहरूबाट प्रहरीले ८४ ग्राम खैरो हिरोइन बरामद गरेको छ।
साथै, ४४ हजार ६ सय नेपाली रुपैयाँ र ४ हजार ९ सय भारू बरामद गरेको छ।
प्रहरीले पक्राउ गरेकाहरूमाथि थप अनुसन्धान थालेको छ।
