गुल्मीमा जेठी आमाको हत्या गरेको आरोपमा प्रहरीले एक जनालाई पक्राउ गरेको छ।
रेसुंगा नगरपालिका वडा नम्बर १३ दुबिचौर बस्ने ६० वर्षीया पार्वती बिकको हत्या भएको थियो। उनको हत्या गरेको आरोपमा प्रहरीले २५ वर्षीय प्रकाश बिकलाई आइतबार साँझ पक्राउ गरेको जिल्ला प्रहरी कार्यालय गुल्मीले जनाएको छ।
पार्वती नाताले प्रकाशका जेठी आमा पर्छन्। सामान्य विवादकै कारण प्रकाशले जेठी आमा पार्वतीको हत्या गरेको कार्यालयले जनाएको छ।
पार्वतीमाथि लाठी प्रहार गर्दा गम्भीर घाइते भएकी थिइन्। घाइते भएपछि उपचारको लागि उनलाई जिल्ला अस्पताल तम्घासमा लगिएको थियो।
त्यहाँ पुर्याउँदा उनलाई चिकित्सकले मृत घोषणा गरेका थिए।
मृत्यु भएको खबर पाएपछि जिल्ला प्रहरी कार्यालय गुल्मीबाट खटिएको प्रहरीले प्रकाशलाई पक्राउ गरेको थियो।
प्रहरीले घटनासम्बन्धी थप अनुसन्धान अघि बढाएको छ।
