भक्तपुर कौशलटारनजिकै सोमबार राति एउटा मोटरसाइकल दुर्घटना हुँदा एक जनाको मृत्यु भएको छ।
ना३२प ६६७३ नम्बरको मोटरसाइकल आफैं अनियन्त्रित भएर दुर्घटना भएको प्रहरीले जनाएको छ।
मृत्यु हुनेमा पर्सा वीरगन्ज महानगरपालिका-२० घर भएका ३० वर्षीय लोकनाथ ठाकुर छन्। उनी भक्तपुर नगरपालिका-१० कमलबिनायकमा बस्दै आएका थिए।
उनको उपचारको क्रममा भक्तपुर इन्टरनेशनल अस्पतालमा मध्यराति मृत्यु भएको थियो। प्रहरीका अनुसार भक्तपुरबाट काठमाडौं आउँदै गरेको मोटरसाइकल सडकको रेलिङमा ठोक्किँदा दुर्घटना भएको थियो।
तीव्र गतिका कारण मोटरसाइकल अनियन्त्रित भएर दुर्घटना भएको महानगरीय प्रहरी परिसर भक्तपुरले जनाएको छ।
दुर्घटनामा वीरगन्ज-२० घर भई हाल इलाका प्रहरी कार्यालय चन्द्रनिगाहपुरमा कार्यरत् प्रहरी हवल्दार सियाराम सिंह घाइते छन्। उनी मोटरसाइकलको पछाडि बसेका थिए।
उनको अहिले नेपाल प्रहरी अस्पताल महाराजगञ्जमा उपचार भइरहेको छ।
