मकवानपुरमा सुनचाँदी व्यवसायीको अपहरण गरेको आरोपमा प्रहरीले चार जनालाई पक्राउ गरेको छ।
आइतबार बिहान ९ बजे हेटौडा उपमहानगरपालिका वडा नम्बर १० बासुदेवमार्गस्थित सडकबाट जे.एस. सुनचाँदी पसलका संचालक अन्दाजी ४० वर्षीय जितेन्द्र विश्वकर्माको अपहरण भएको थियो।
उनको अपहरण गरेको आरोपमा प्रहरीले चार जनालाई पक्राउ गरेको प्रवक्ता तथा प्रहरी नायब उपरीक्षक जयश्वर रिमालले जानकारी दिए।
हेटौडा उपमहानगरपालिका वडा नम्बर १० बस्ने ३९ वर्षीय बिनोदलाल श्रेष्ठ, ३० वर्षीय अनिल लामा, ३२ वर्षीय बुद्ध लामा र २७ वर्षीय आदेश लामालाई प्रहरीले पक्राउ गरेको हो। जितेन्द्र विश्वकर्माको सकुशल उद्दार भइसकेको प्रहरी नायब उपरीक्षक रिमालले बताए।
उनको अपहरण भएको खबर पाएपछि बिहान प्रहरीको टोली खटिएको थियो। बा २० च ८९६० नम्बरको सेतो कारमा आएका चार/ पाँच जना अपरिचित व्यक्तिहरूले अपहरण गरी लगेको भन्ने सूचना प्रहरीले पाएको थियो।
सूचनाको आधारमा खटिएको टोलीले हेटौडा-५ मा रहेको रिकभरिङ समुहको कार्यालय अगाडी कार पार्किङमा राखेको फेला पारेको थियो।
प्रहरीले त्यसपछि खोजतलास गर्दा रिकभरिङ परिसरबाट पक्राउ गरेको हो। 'अहिले उनीहरूमाथि सोधपुछ भइसकेको छैन। आज म्याद थप भयो। अब अनुसन्धान गर्छौ,' रिमालले भने।
उनीहरूलाई १५ दिन हिरासतमा राखेर अनुसन्धान गर्न जिल्ला अदालत मकवानपुरबाट प्रहरीले अनुमति पाएको छ।
