झापाको बिर्तामोडमा एक व्यक्तिको हत्या भएको छ।
बिर्तामोड नगरपालिका वडा नम्बर ४ मा डेरा गरी बस्ने कचनकवल गाउँपालिका वडा नम्बर ३ का बाबुलाल भनिने ५० वर्षीय भात्रु राजवंशीको आइतबार हत्या भएको जिल्ला प्रहरी कार्यालय झापाका प्रहरी नायब उपरीक्षक राकेश थापाले जानकारी दिए।
अटो रिक्सा चालक राजवंशीको शव भुइँमा लडेको अवस्थामा फेला परेको थियो। अनुहारमा चोटपटक देखिएको हुँदा हत्या नै भएको थापाले बताए।
इलाका प्रहरी कार्यालय बिर्तामोडका प्रमुख प्रहरी नायव उपरीक्षक सन्तोष आचार्यले घटनास्थल सिल गरेर अनुसन्धान सुरू गरिएको बताए। मृतकका १५ वर्षीय छोरा देव नारायणले आफ्ना कान्छा काका रतनलाल राजबंशीले बुवाको हत्या गरेको प्रहरीसमक्ष बताएका छन्।
हत्याको आरोप लागेका मृतकका भाइ फरार छन्। उनले आफ्ना ९ वर्षीय छोरालाई लिएर साइकल चढेर फरार भएको प्रहरीले बताएको छ।
‘छोराले काकाले हत्या गरेको भनेका छन्। अहिले उनी फरार छन् हामी खोज्दैछौं,’ थापाले भने।
उनका अनुसार भात्रुमाथि कुटपिट गरी हत्या गरिएको थियो।
प्रहरीले थप अनुसन्धान अघि बढाएको छ।
