प्रहरीले जुवा खेलिरहेको अवस्थामा ६ जनालाई काठमाडौंबाट पक्राउ गरेको छ।
काठमाडौं महानगरपालिका वडा नम्बर १० मध्यबानेश्वरबाट आइतबार राति सवा ७ बजे जुवा खेलिरहेका ६ जनालाई पक्राउ गरेको प्रहरी उपरीक्षक रमेश बस्नेतले जानकारी दिए।
रामकृष्ण केसीको साढे दुई तलाको घरमा जुवा खेलिरहेको भन्ने सूचना प्रहरीले पाएको थियो। सोही सूचनाको आधारमा महानगरीय प्रहरी वृत्त बानेश्वरबाट खटिएको प्रहरी नायब उपरीक्षक मिमबहादुर लामासहितको टोलीले उनीहरूलाई पक्राउ गरेको हो।
उनीहरूबाट प्रहरीले ४ लाख ४८ हजार ५ सय रूपैयाँ बरामद गरेको थियो। उनीहरूमाथि प्रहरीले थप अनुसन्धान अघि बढाएको छ।