अछाममा महिलाको शव बेवारिसे अवस्थामा फेला परेको छ।
करिब ३० वर्षकी महिलाको शव शनिबार चौरपाटी गाउँपालिका-४ बुढीगंगा नदी किनार चित्रेमा फेला परेको हो।
दुई बालकलदे नदी किनारमा खेल्ने क्रममा शव देखेपछि प्रहरीलाई खबर गरिएको थियो।
जिल्ला प्रहरी कार्यालय अछामका सूचना अधिकारी जनक बोहराले शव कसको हो भन्नेबारे पत्ता नलागेको बताए।
‘हराएको भनेर पनि कोही आएको छैन, महिलाको शव फेला परेकाले कसैको आफन्तको भए सम्पर्कमा आउन सूचना गरेका छौं,’ उनले भने।
शव पोष्टमार्टमका लागि अहिले जिल्ला अस्पताल अछाममा राखिएको छ। बाजुराबाट शव बगेर अछाम पुगेको हुनसक्ने अनुमान गरिएको छ।
महिलाको बेवारिसे शव सुरक्षित राख्ने प्रविधि अस्पतालमा नभएकाले समस्या भएको प्रहरीले जनाएको छ। त्यहाँ एक मात्रै शवगृह रहेकाले अरु शवको पोष्टमार्टमा गर्न समस्या भएको हो।
