बारामा प्रहरीले १५ किलो गाँजासहित एक जनालाई आइतबार अपराह्न पक्राउ गरेको छ।
इलाका प्रहरी कार्यालय जितपुरको टोलीले बारा जितपुरसिमरा उपमहानगरपालिका-७ बाट एक जनालाई पक्राउ गरेको हो।
पक्राउ पर्नेमा पर्सा पकहामैनपुर गाउँपालिका-१ का ३६ वर्षीय राज महमत मियाँ हजाम छन्।
हजाम मोटरसाइकलमा सवार थिए। उनले पिठ्युँ र केरियरमा राखेको दुई पोकामा १५ किलो गाँजा फेला परेको बारा प्रहरी प्रवक्ता गौतम मिश्रले बताए।
पक्राउ परेका हजामलाई लागुऔषध मुद्दामा अनुसन्धान थालिएको मिश्रले बताए।
