लमजुङको मध्यनेपाल नगरपालिका वडा नम्बर ७ का ९ जना स्थानीयलाई उद्धार गरिएको छ।
मंगलबार खेत रोपाइँ गर्न गएका उनीहरू मिदिम खोलामा बाढी आएपछि बीचमै रोकिएका थिए।
उनीहरूलाई बुधबार बिहान उद्धार गरिएको मेयर रमेशकुमार पाण्डेले जानकारी दिए।
खोलाको बीच भागमा फसेका उनीहरूको उद्धारका लागि हेलिकप्टरलाई बोलाइए पनि खराब मौसमले जान सकेको थिएन।
मेयर पाण्डेका अनुसार आज बिहान मिदिम खोलालाई डोजर लगाएर विभिन्न भंगालोमा पानी पठाएर स्थानीयलाई उद्धार गरिएको हो।
९ जनालाई डोजरको बकेटमा राखेर उद्धार गरेको उनले जानकारी दिए।
‘खेत रोपाइँका लागि गएका उनीहरू खोलामा बाढी आएपछि रातभर उतै बसेका थिए,’ उनले भने, ‘बिहान हामीले उद्धार गरियो।’
उनीहरू वडा नम्बर ७ को राटमाटाका हुन्।
