वसन्तपुर डबली र भोटाहिटीबाट प्रहरीले दुई जनालाई उद्धार गरेको छ।
सडकमै बसोबास रहेका उनीहरूको अवस्था चिन्ताजनक पाइएपछि प्रहरीले उद्धार गरी अस्पताल पुर्याएको हो।
उनीहरूको लडेर शरीरमा चोटपटक लागेको पाइएपछि प्रहरीले सडकबाट उठाएर वीर अस्पताल पुर्याएको हो।
आइतबार बिहान भोटाहिटी र वसन्तपुरबाट मध्यान्ह दिउँसो एक-एक जनालाई उद्धार गरी वीर अस्पताल पठाइएको महानगरीय प्रहरी वृत्त जनसेवाले जनाएको छ।
दुबैको परिचय खुलिसकेको छैन। उनीहरू बोल्न सक्ने अवस्थामा छैनन्।
‘सडकमै बस्ने, त्यहीँ खाने गरेका कारण उनीहरूको जीवन अत्यन्तै चिन्ताजनक देखिएको छ, त्यस्ता व्यक्तिलाई उद्धार गरी अस्पताल पठाउने, अनाथ आश्रम, वृद्धा आश्रम पठाउने वा आफन्त भेटिए जिम्मा लगाउने हाम्रो अभियान छ,’ महानगरीय प्रहरी परिसर काठमाडौंका प्रमुख एसएसपी अशोक सिंहले सेतोपाटीसँग भने।
