बैतडीमा तीन महिनाको छोराको हत्या गरेको आरोपमा बाबु पक्राउ परेका छन्।
छोरा लक्ष्मण चन्दको हत्या गरेको अभियोगमा पञ्चेश्वर गाउँपालिका-५ खनाडीका ४० वर्षीय राजबहादुर चन्दलाई मंगलबार दिउँसो प्रहरीले पक्राउ गरेको हो।
राजबहादुरले आफ्नै घरमा छोरा लक्ष्मणलाई लछार-पछार गरी कुटपिट गर्दा बालकको घटनास्थलमै मृत्यु भएको बैतडी प्रहरीले जनाएको छ।
राजबहादुरले उनका बुवा ७० वर्षीय मन्धिर चन्दलाई समेत कुटपिट गरी घाइते बनाएको प्रहरीले जनाएको छ।
जिल्ला प्रहरी कार्यालय बैतडी र प्रहरी चौकी बलाराबाट खटिएको प्रहरीले राजबहादुरलाई पक्राउ गरेको हो।
कुटपिटबाट घाइते भएका मन्धिरको स्थानीय मेडिकलमा उपचार भइरहेको छ।
