रुपन्देहीको बुटवलमा आइतबार राति भएको सडक दुर्घटनामा परी एक जनाको मृत्यु भएको छ। दुर्घटनामा परी तीन जना घाइते भएका छन्।
आइतबार मध्यराति पौने १ बजेतिर बुटवल उप-महानगरपालिका वडा नं. १० कालिकानगर सन्जिवनी कलेज नजिक सर्भिसलेनमा मोटरसाइकल र स्कुटर आपसमा ठक्कर खाँदा एक युवाको मृत्यु भएको हो।
तिलोत्तमाको योगीकुटीदेखि बुटवल राजमार्ग चौराहातर्फ गइरहेको लु ५८ प २८३५ नं.को स्कुटर र विपरीत दिशाबाट योगीकुटीतर्फ गइरहेको लु १५ प १४७२ नं.को मोटरसाइकल आपसमा ठक्कर खाँदा मोटरसाइकल चालक बुटवल ११ का अन्दाजी २२ वर्षीय सन्जु खनालको मृत्यु भएको हो।
दुर्घटनामा परी गम्भीर घाइते भएका खनालको उपचारको क्रममा युनिभर्सल कलेज अफ मेडिकल साइन्सेज भैरहवामा मृत्यु भएको लुम्बिनी प्रदेश ट्राफिक प्रहरी कार्यालय बुटवलले जनाएको छ।
लुम्बिनी प्रदेश ट्राफिक प्रहरी कार्यालयका प्रवक्ता प्रहरी नायब उपरीक्षक डिल्लीनारायण पाण्डेका अनुसार दुर्घटनामा परी स्कुटर चालक बुटवल ११ का २५ वर्षीय शिशिर मगर, स्कुटरको पछाडि सवार सोही स्थानका सचिन पाण्डे र मोटरसाइकलमा सवार बुटवल ११ कै २१ वर्षीय साजन पुन घाइते भएका छन्।
