चरेस र चरेस पेल्ने मेसिनसहित पर्साबाट एक जना पक्राउ परेका छन्।
शनिबार पर्सा बहुदरमाई नगरपालिका-७ विश्रामपुरका ६० वर्षीय मुसलिम देवानलाई प्रहरीले घरैबाट पक्राउ गरेको हो।
उनको घरबाट ९ किलो २० ग्राम चरेस, चरेस बनाउने लासा ९२० ग्राम र चरेस पेल्ने तीन थान मेसिन बरामद गरिएको पर्सा प्रहरी प्रवक्ता प्रहरी नायब उपरीक्षक मनोजित कुँवरले बताए।
चरेसको बिक्री-वितरण भइरहेको सूचनाका आधारमा प्रहरीले देवानको घरमा पुगेको थियो। उनको घरको कोठाभित्रको खाटमुनि लुकाइएको अवस्थामा चरेस र उपकरण बरामद भएको कुँवरले बताए।
देवानलाई हिरासतमा राखेर प्रहरीले अनुसन्धान थालेको छ।
