झापाको कमल गाउँपालिकामा वातावरण प्रदुषणलाई बेवास्ता गर्दै घना मानव बस्तीछेऊमै इँटा उद्योग खोल्ने तयारी गरेपछि स्थानीय आन्दोलित भएका छन्।
उद्योगी गुणराज थापाले झापाको कमल गाउँपालिका-१ स्थित रतनचौनमा गाउँलेको असहमति हुदाँहुदै इँटा उद्योग खोल्न लागेपछि उनीहरूले पत्रकार सम्मेलन गर्दै विरोध गरेका हुन्।
उद्योगी थापाले सो स्थानमा निजी स्वामित्वमा रहेको १६ बिगाहा जमिनमा इँटा उद्योग खोल्ने तयारी गरेका छन्।
इँटा उद्योगको वायु प्रदूषणले वातावरण ठुलो असर पर्ने भएकोले त्यसको विरोधमा उत्रिएको युवा नेता रविन ढुङ्गानाको भनाइ छ।
‘वायु मण्डलमा पिएम नाम कणको मात्रा ४० हुनु पर्नेमा इँटा उद्योगबाट निस्किने प्रदुषणको मात्रा ५ सय हुन्छ,’ उनले दाबी गरे, ‘जुन वातावरणको लागि खतरा हो, त्यसैले हामी इँटा उद्योग खोल्न दिने पक्षमा छैनौँ।’
उद्योगीले पहिले कुरा मात्र गर्ने गरेको तर यस पटक उद्योगको संरचना निर्माणका लागि सरसामान नै झार्न थालेपछि स्थानीयहरू संगठित बन्दै आन्दोलनमा उत्रिएको उनको भनाइ छ। ‘अब हामी वारपारको अवस्थामा पुगेका छौँ,’ उनले भने।
त्यस्तै, स्थानीय सविता कटुवालले उद्योगी दादागिरी शैलीमा इँटा उद्योग खोल्न लागेकाले त्यसको प्रतिकारमा उत्रिएको बताइन्। टोल विकास संस्था, नागरिक समाज, गाउँवासीको सहमतिबिना कुन कानुनले इँटा उद्योग खोल्ने अनुमति दिएको प्रश्न गर्दै उनले भनिन्, ‘पैसा र शक्तिको आडमा कानुनलाई लत्याएर जे पनि गर्न पाइन्छ?’
यता कमल गाउँपालिका १ नम्बर वडाध्यक्ष केदार कटुवालले गाउँमा इँटा उद्योग खोल्ने विषयमा वडा कार्यालय र गाउँपालिकामा आधिकारिक रुपमा केही सूचना र पत्र नआएको बताए।
उद्योगीले कहाँबाट अनुमति ल्याएर उद्योग खोल्ने तयारीमा लागेको भन्नेबारे आफू पनि आश्चर्यमा परेको उनको भनाइ छ। उद्योग खोल्ने विषयमा वडा कार्यालयबाटै सर्जमिन हुनुपर्ने बताउँदै उनले यस विषयमा आफूलाई पनि थाहा नभएको प्रतिक्रिया दिए।
