डिजेल बोकेको ट्याङ्करले स्कुटरलाई ठक्कर दिँदा एक जनाको मृत्यु भएको छ।
मंगलबार साँझ सवा ६ बजे काठमाडौं महानगरपालिका-१४ बल्खुमा दुर्घटना हुँदा एक जनाको मृत्यु भएको महानगरीय प्रहरी वृत्त, कालिमाटीले जनाएको छ।
ना ७ ख २२०९ नम्बरको डिजेल ट्याङ्करले बा ५४ प ३०१ नम्बरको स्कुटरलाई ठक्कर दिएको थियो। ठक्करबाट स्कुटर पछाडि सवार बल्खु आश्रममार्ग घर भएकी ५८ वर्षीया रीता खड्गी घाइते भएकी थिइन्।
उनको उपचारको लागि तत्कालै बल्खुकै बयोधा अस्पतालमा लगिएको थियो। गम्भीर घाइते उनको उपचारकै क्रममा ७ बजे मृत्यु भएको वृत्तका प्रहरी नायब उपरीक्षक (डिएसपी) अपिलराज बोहराले सेतोपाटीलाई जानकारी दिए। उनका अनुसार स्कुटर चालक श्रीमान जेन खड्गीको सामान्य घाइते छन् ।
ट्याङ्कर चालक बारा जितपुर सिमराका ३० वर्षीय सागर लम्साललाई प्रहरीले नियन्त्रणमा लिएको छ।
प्रहरीले ट्याङ्कर महानगरीय प्रहरी परिसर, काठमाडौंमा राखेको छ भने स्कुटर बल्खु ट्राफिकको नियन्त्रणमा छ।
