एक महिनाअघि साथीको घरमा मृत फेला परेका मोरङ उर्लाबारी-५ का ३१ वर्षीय प्रवीण बाँस्तोलाको घटनाबारे प्रहरीले कुनै अनुसन्धान नगरेको परिवारले आरोप लगाएका छन्।
सोमबार आफ्नै घरमा पत्रकार सम्मेलन गरी परिवारले न्याय दिलाइदिन माग गरेका छन्।
‘सुरूमा प्रहरीले दोषी पत्ता लगाउने आश्वासन दियो। तर, अहिले घटनामा संलग्न सबैलाई छोडिदिएको छ,’ मृतक प्रवीणका बुवा प्रेम बाँस्तोलाले भने, ‘पुस ४ गते घरबाट निस्किएको छोरो ५ गते ११ बजेतिर मर्यो अरे भनेर अज्ञात नम्बरको फोनबाट खबर आयो। कहाँ मर्यो, कसरी मर्यो, कसले मार्यो, हामी परिवारका सदस्यलाई केही थाहा भएन। प्रहरी पनि प्रत्येक पटक अलग-अलग बयान दिन्छ। मर्ने त मर्यो तर न्याय मर्नु भएन नि।’
छोराको शव मृत अवस्थामा गोदावारी अस्पतालमा भेटिएपछि प्रवीणलाई त्यहाँसम्म कसले ल्यायो भन्नेसम्म थाहा नभएको परिवारले जनायो।
मृत व्यक्तिलाई एम्बुलेन्समा हालेर ल्याइएको परिवारले दाबी गरेको छ। तर, प्रहरीले प्रवीणको ढुकढुकी भएको अनुमानमा अस्पताल पुर्याएको दाबी गर्दै आएको छ।
अस्पतालले परिवारलाई दिएको जानकारी अनुसार प्रवीणको मृत्यु भएको ३/४ घण्टापछि मात्र एम्बुलेन्समा हालेर अस्पताल ल्याइएको जानकारी गरायो।
कर्तव्य ज्यान मुद्दालाई दुर्घटनामा परिणत गर्न प्रहरी नै लागेको पीडित परिवारले आरोप लगाएका छन्।
प्रहरीले आफन्त र स्थानीयलाई जानकारी नै नदिएर नियन्त्रणमा लिइएका आरोपितलाई छोडेको परिवारले बताएका छन्।
‘पोस्टमार्टम रिपोर्ट प्राप्त भए पनि मृत्युको कारण सामान्य भनेर प्रहरीले घटनालाई ढिसमिस गराएको देखिन्छ,’ मृतकका बाबुले भने।
यता इलाका प्रहरी कार्यालय उर्लाबारीका प्रहरी निरीक्षक उद्धव पोख्रेलले भने कर्तव्य ज्यानको कुनै प्रमाण फेला नपरेकोले सरकारी वकिलको कार्यालयले पक्राउ परेका सबैलाई छोडिदिएको बताए।
उनले मृतकको शरीरमा कुनै चोट, नीलडाम पनि नदेखिएको जानकारी दिए।
‘मिसिल मृत भएको छैन, अनुसन्धान पनि सकिएको छैन, प्रमाण फेला परे उनीहरू पक्राउ पर्न सक्छन्,’ प्रहरी निरीक्षक पोख्रेलले भने।
यसैबीच, पीडित परिवारले किटानी जाहेरी दिन पटक-पटक प्रहरी कार्यालय जाँदा इलाका प्रहरी कार्यालय उर्लाबारीका प्रहरी निरीक्षक उद्धव पोख्रेलले उल्टो थर्काएको मृतक प्रविणकी बहिनी दुर्गा बाँस्तोलाले बताइन्।
‘प्रमाण नष्ट गर्ने र अपराधीको संरक्षणमा प्रहरीको संलग्नता देखिन्छ,’ दुर्गाले भनिन्।
बाँस्तोला परिवारले घटना भवितव्य नभइ हत्या नै भएको दाबी गरेका छन्।
३१ वर्षीय बाँस्तोला गत पुस ५ गते शंकास्पद अवस्थामा मृत भेटिएका थिए। साथीको डेरामा गएका व्यक्ति मृत भेटिएका र उनीसँगै रहेका चार जना साथीको भूमिका शंकास्पद देखिएको भन्दै यसअघि प्रहरीले उनीहरूलाई नियन्त्रणमा लिएको थियो।
घटनामा संलग्न भनिएका उर्लाबारी-६ बस्ने रिकेश सिवा भनिने राकेश दर्जी, दीपेश पौडेल, पप्पु भनिने राजेश रणपहेली पक्राउ परेका थिए।
मृतकका बुवा प्रेमका अनुसार साथीसँगै बसेर मादक पदार्थ सेवन गरेको भनिए पनि परिवारलाई मृत्युको जानकारी नदिई शव अस्पताल पुर्याएका थिए।
‘१२ घण्टापछि मात्रै परिवारले घटनाबारे जानकारी पाउनु, स्थानीय गोदावरी अस्पतालमा मृतकको शव हुँदाहुँदै मावा खोलामा लाश छ भनेर ढाँट्नेजस्ता कार्य भएकोले घटना शंकास्पद रहेको छ,’ उनले भने।
उनले घटनाको सत्य-तथ्य छानविन माग गरेका छन्।
