शे-फोक्सुण्डो राष्ट्रिय निकुञ्ज क्षेत्रबाट अवैध जीवजन्तु तस्करीमा संलग्न १ जना पक्राउ परेका छन्।
नेपाली सेना र निकुञ्ज कर्मचारीसहितको टोलीले सोमबार निकुञ्ज क्षेत्र अन्तर्गतको त्रिपुरासुन्दरी न.पा.११ स्थित थर्मु निगालीगौराबाट त्रिपुरासुन्दरी-६ बस्ने ५३ वर्षीय लक्ष्मीचन्द्र शाहीलाई पक्राउ गरेको हो।
टोलीले शाहीको साथबाट भरूवा बन्दुक १ थान, यसमा लाग्ने गोली १९ थान, छर्रा १ थान, केप १ थान, बारुद डब्वा १ थान र शिकार गरिएको जनावरको मासु तथा शिकारको लागि आवश्यक अन्य बन्दोबस्तीका सामग्री बरामद गरेको छ।
पक्राउ परेका शाहीलाई आवश्यक कारबाहीको लागि निकुञ्ज कार्यालयमा बुझाइएको नेपाली सेनाले जनाएको छ।
