काठमाडौं उपत्यकामा आइतबार बिहानको तापक्रम ३ डिग्री सेल्सियस पुगेको छ। शनिबार न्यूनतम तापक्रम १ दमलव ३ डिग्रीमा झरेको काठमाडौंमा आइतबार बिहानको तापक्रम झण्डै २ डिग्रीले बढेको मौसम पूर्वानुमान महाशाखाले जानकारी दिएको छ।
आइतबार देशका केही ठाउँमा हल्का पानी पर्ने र उच्च हिमाली भेगमा हिमपात हुने मौसमविद्ले बताएका छन् ।
आइतबार दिउँसो देशभर आंशिकदेखि सामान्य बदली रही सुदूरपश्चिम, कर्णाली र गण्डकी प्रदेशका उच्च हिमाली भू-भागमा हल्का हिमपात हुने तथा सुदूरपश्चिम र कर्णाली प्रदेशका पहाडी भू-भागका थोरै स्थानमा हल्का वर्षाको सम्भावना रहेको मौसम पूर्वानुमान महाशाखाले जनाएको छ।
सुदूरपश्चिम, कर्णाली र गण्डकी प्रदेशमा हल्कादेखि मध्यम वर्षा हुने सम्भावना रहेको मौसम पूर्वानुमान महाशाखाकी मौसमविद् सजिना शाक्यले जानकारी दिइन् ।
शाक्यका अनुसार पश्चिमी वायुको प्रभावले आइतबार रातिदेखि दिउँसोको तुलनामा मौसम अझै बदली हुनेछ भने पानी पर्ने क्रम बढ्नेछ ।
यस्तै राति देशभर आंशिकदेखि सामान्य बदली भई सुदूरपश्चिम, कर्णाली, लुम्बिनी, गण्डकी प्रदेशका उच्च हिमाली भू-भागमा हल्कादेखि मध्यम हिमपात हुनेछ भने सुदूरपश्चिम, कर्णाली कर्णाली, लुम्बिनी र गण्डकी प्रदेशका एक दुई स्थानमा हल्का वर्षाको सम्भावना छ ।
आइतबारभन्दा सोमबारको मौसम खराव हुने मौसमविद्को पूर्वानुमान छ। सोमबार दिउँसो देशभर आंशिकदेखि सामान्य बदली भई सुदूरपश्चिम, कर्णाली, गण्डकी र बाग्मती प्रदेशका उच्च हिमाली भू-भागमा हल्कादेखि मध्यम हिमपात हुनेछ ।
यस्तै सुदूरपश्चिम, कर्णाली, गण्डकी, बाग्मती र प्रदेश १ को केही ठाउँमा हल्का वर्षाको सम्भावना रहेको छ । यसैगरी सोमबार राति सुदूरपश्चिम, कर्णाली, गण्डकी, प्रदेशका बाग्मती र प्रदेश १ को केही ठाउँमा हल्का वर्षाको सम्भावना छ भने उच्च हिमाली भू-भागमा हल्कादेखि मध्यम हिमपात हुनेछ ।
यसैगरी मंगलबार दिउँसो सुदूरपश्चिम, कर्णाली, गण्डकी, बाग्मती र प्रदेश १ मा पानी पर्ने र उच्च हिमाली भू-भागमा हल्कादेखि मध्यम खालको हिमपात हुनेछ ।
मंगलबार रातिदेखि भने मौसममा थोरै सुधार आउनेछ । मंगलबार राति भने सुदूरपश्चिम प्रदेशका पहाडी भू-भागहरुका केही स्थानमा हल्का पानी पर्ने र सुदूरपश्चिम, कर्णाली, गण्डकी, बागमती र प्रदेश १ का उच्च हिमाली भू-भागमा हिमपात पनि हुनेछ ।
