बुटवल भैरहवा ६ लेन सडकखण्डको नयाँमिलमा ट्रकले स्कुटरलाई ठक्कर दिँदा दुई जना गम्भीर घाइते भएका छन्।
भैरहवाबाट बुटवलतर्फ आउँदै गरेको ग १ ख ४८८८ नम्बरको ट्रकले लु २० प ३७५२ नम्बरको स्कुटरलाई दिउँसो १ बजेतिर ठक्कर दिएको हो।
नयाँमिल भित्री सडकबाट ६ लेन सडकमा निस्किएको स्कुटरलाई मालवाहक ट्रकले ठक्कर दिएको मंगलापुर ट्राफिक प्रहरीले जानकारी दिएको छ।
ट्रकको ठक्करबाट तिलोत्तमा ११ शिवपुरका रणबहादुर खड्का र सावित्री खड्का घाइते भएका छन्। उनीहरू श्रीमान-श्रीमती रहेको र मणिग्रामस्थित क्रिमसन अस्पतालमा उपचार भइरहेको प्रहरीले जनाएको छ।
स्कुटरलाई ट्रकको अगाडि तर्फको भागले च्यापिएको अवस्थामा घाइतेहरूको उद्धार गरिएको स्थानीयले जानकारी दिएका छन्।
