रौतहटमा बाघको आक्रमणबाट एक पुरूषको मृत्यु भएको छ।
इलाका प्रहरी कार्यलाय चन्द्रपुर र सशस्त्र प्रहरीको टोलीले बुधबार बिहान साढे १० बजे एक पुरूषको शव फेला परेको हो।
मृत्यु हुनेमा चन्द्रपुर नगरपालिका-६ चिम्नी टोल बस्ने २७ वर्षीय संगम भण्डारी छन्।
संगम मंगलबार बिहान ७ बजे वडा नम्बर ४ मा रहेको जंगलमा घाँस काट्न गएका थिए। तर बेलुकीसम्म पनि नफर्किएपछि आफन्त र स्थानीय गरी १४ जनाले टोली बनाएर संगमलाई खोज्न बुधबार बिहान सोही जंगल पसेका थिए।
तर बाघले उनीहरूमाथि पनि आक्रमण गरेको चन्द्रपुरका प्रमुख प्रहरी नायब उपरीक्षक (डिएसपी) हेमबहादुर शाहीले जानकारी दिए।
बाघको आक्रमणबाट चिम्नी टोलकै दुई जना घाइते समेत भएका छन्।
घाइते हुनेमा ३० वर्षीय अशोक थापा र ३४ वर्षीय प्रविन श्रेष्ठ छन्। उनीहरूको कान, गाला, छाती, कुममा बाघले चिथोरेको डिएसपी शाहीले बताए।
उनीहरूको चन्द्रपुर अस्पतालमा उपचार भइरहेको छ।
प्रहरीले एक झाडीमा संगमको कम्मरभन्दा मुनिको भाग खाएको अवस्थामा शव फेला परेको हो। अहिले प्रहरीको मुचुल्का टोली त्यहाँ पुगेको डिएसपी शाहीले बताए।