मलेसियामा नेपालीलाई अपहरण गरी शरीर बन्धक बनाएको अभियोगमा प्रहरीले मोरङ सुन्दर-हरैंचा नगरपालिकाका डेबिड भनिने दुर्गाबहादुर श्रेष्ठलाई पक्राउ गरेको छ।
केन्द्रीय अनुसन्धान ब्युरोले उनलाई मंगलबार साँझ महाराजगन्ज क्षेत्रबाट पक्राउ गरेको हो।
ब्युरो प्रवक्ता प्रहरी उपरीक्षक बेलबहादुर पाण्डेका अनुसार उनीविरूद्ध गत जुन महिनामा मलेसियामा अपहरण गरेको कसुरमा जाहेरी छ।
मलेसियामा आफ्नो रेष्टुरेन्टमा काम गर्ने दाङका मोहम्मद रैदासलाई उनले छ दिन अपहरण गरी शरीर बन्धक बनाएको जाहेरी परेको थियो। प्रहरीले उनलाई पक्राउ पूर्जी जारीसमेत गरेको थियो।
पछिल्लो समय मलेसियाबाट काठमाडौं फर्किएको सूचना पाएपछि प्रहरीले उनलाई खोजी गरिरहेको थियो।
दाङका ३५ वर्षीय मद्म रैदासलाई उनले अपहरण गरेको जाहेरी छ। तर, पीडित भने मलेसियामै छन्।
‘पीडितलाई उद्धार गरेर नेपाल ल्याउने हाम्रो प्रयास जारी छ,’ पाण्डेले सेतोपाटीसँग भने।
श्रेष्ठलाई अदालतबाट थुनामा राख्ने अनुमतिका लागि लैजाने प्रक्रिया थालिएको पाण्डेले बताए।
यसरी भयो अपहरण
प्रहरीका अनुसार श्रेष्ठ २२ वर्षदेखि मलेसिया बस्दै आएका छन्। उनको त्यहाँ रेष्टुरेन्ट छ।
दाङका रैदास उनकै रेष्टुरेन्टमा काम गर्थे। गत जुनमा उनले रैदासलाई आफ्ना चालकको कोठामा ६ दिन बन्धक बनाएर फिरौती मागेको खुलेको छ।
श्रेष्ठले रैदासकी श्रीमतीलाई ६० हजार रिंगेट रुपैयाँ फिरौती मागेका थिए।
फिरौती रकम डिपोजिट गर्न श्रीमती दाङस्थित हिमालयन बैंकमा १२ लाख रुपैयाँ लिएर जुन २८ मा पुगेकी थिइन्। श्रेष्ठले उक्त बैंकमा रहेको आफ्नो खातामा रकम जम्मा गर्न भनेका थिए।
सुरूमा १२ लाख रुपैयाँ मात्र डिपोजिट गर्नसक्ने जनाएर श्रीमती बैंक पुगेकी थिइन्।
के कामका लागि डिपोजिट गर्न लागेको भनी बैंकका कर्मचारीले सोधेका थिए। त्यसबेला उनले सबै कुरा भनिदिइन्।
यसपछि हिमालयन बैंकको केन्द्रीय कार्यालयमा कुरा पुग्यो। केन्द्रीय कार्यालयले राष्ट्र बैंकलाई भन्यो।
राष्ट्र बैंक हुँदै प्रहरीमा कुरा पुगे पनि श्रीमतीले जुन ३० मा अरू तीन लाख रुपैयाँ श्रेष्ठको खातामा जम्मा गरेकी थिइन्।
‘राष्ट्र बैंकले ब्युरोमा खबर गरेपछि अनुसन्धान सुरू भएको हो,’ ब्युरो प्रमुख प्रहरी नायब महानिरीक्षक सहकुल थापाले भने, ‘लकडाउन खुलेपछि श्रीमती काठमाडौं आएर जाहेरी दिएपछि हामीले पीडकलाई खोज्न थालेका हौं।’
श्रेष्ठको खाता बैंक र प्रहरीले निगरानी गरिरहेको थियो। नेपाल आएपछि पैसा निकालेपछि श्रेष्ठलाई प्रहरीले पक्राउ गरेको थापाले बताए।
