श्रीमान-श्रीमतीको झगडा छुट्याउन खोज्दा होटल सञ्चालकले धकेल्दा लडेर एक जनाको मृत्यु भएको छ।
घटना मोरङको उर्लाबारी-७ मा रहेको युनिक होटलमा भएको हो। गत आइतबार साँझ उक्त होटलमा एक दम्पत्ती डिनरका लागि पुगेका थिए।
डिनरअघि मदिरा सेवन गरेका उनीहरूले एकछिनमा झगडा गर्न थाले। राति साढे ११ बजेतिर ग्राहकले झगडा गरेपछि होटल सञ्चालक गोपाल तामाङले उनीहरूलाई भित्र झगडा नगर्न बरू बाहिर जान भने। उनीहरूले भनेको नमानेपछि तामाङले धकेलेर उनीहरूलाई बाहिर पठाउन खोजे। त्यही क्रममा डिनर खान आएका भारतको सिलुगढीका ३५ वर्षीय सुनिल मल्लिक लडे। उनी बेहोस भए।
उर्लाबारीस्थित गोदावरी अस्पतालमा उपचार गरे पनि निको भएन। थप उपचारका लागि उनलाई झापास्थित बिएन्डसी अस्पताल लगियो। त्यसपछि थप उपचारका लागि उनलाई सिलगुढी पुर्याइयो।
उपचारका क्रममा सोमबार राति मल्लिकको मृत्यु भएको जिल्ला प्रहरी कार्यालय मोरङका प्रमुख प्रहरी उपरीक्षक (एसपी) सन्तोष खड्काले जानकारी दिए।
'झगडा हुँदा मल्लिकलाई तामाङले धकेल्दा उनी लड्न पुगे। त्यसपछि उनी बेहोस भएका थिए,'एसपी खड्काले भने।
एसपी खड्काका अनुसार उनमा बाहिरी चोट देखिएको छैन। यद्यपी टाउकोमा 'टुटुल्को' उठेको उनले बताए।
मृतकका परिवारले उनको शव उतै पोष्टमार्टम गराउनु पर्ने माग राखेका छन्।
'उहाँहरूले पोष्टमार्टम उतै गराउनुपर्ने माग राख्नु भएको छ। उता गराए पनि घटना यताको भएकाले हामीले अनुसन्धान थालेका छौं,'एसपी खड्काले भने,'उता पोष्टमार्टम भए पनि हामीले यताका डाक्टरहरूसँग पनि राय सुझाव लिन्छौं।'
प्रहरीले होटल सञ्चालक तामाङलाई नियन्त्रणमा लिइसकेको छ। उनीमाथि प्रहरीले थप अनुसन्धान गरिरहेको छ।
मल्लिक उर्लाबारीमा सुन पसलमा कालीगढका रूपमा काम गर्थे। उनले नेपाली महिलासँग विवाह गरेका थिए। उनीहरूको विवाह भएको ५-६ वर्ष भएको थियो।