रौतहटका तत्कालीन प्रहरी उपरीक्षक (एसपी) रविराज खड्कालाई गृह मन्त्रालयले कारबाही गर्न प्रहरी प्रधान कार्यालयलाई सिफारिस गरेको छ।
भदौ ११ गते इलाका प्रहरी कार्यालय, गरूडाको हिरासतमा रहेका विजय चमारको मृत्यु प्रकरणमा प्रमुख खड्काको कमजोरी देखिएको भन्दै मन्त्रालयले उनलाई कारबाही गर्न सिफारिस गरेको हो।
गृह मन्त्रालयका प्रवक्ता तथा सहसचिव चक्र बहादुर बुढाका अनुसार घटनामा एसपी खड्काको नियन्त्रण र निर्देशनमा हुनुपर्ने त्यसो नहुँदा सोमबार कारबाही गर्न सिफारिस गरिएको हो।
'जिल्लाका प्रहरी प्रमुख हिसाबले त्यस घटनामा उनको नियन्त्रण र निर्देशनमा हुनुपर्नेमा नभएको पाइएको हो,'प्रवक्ता बुढाले भने,'उनी त्यस घटनामा प्रत्यक्ष रूपमा संलग्न नभए पनि अप्रत्यक्ष रूपमा जिम्मेवारीमा कमजोरी देखियो।'
त्यस्तै, इलाका प्रहरी कार्यालय, गरूडाका तत्कालीन प्रहरी नायब उपरीक्षक (डिएसपी) ज्ञानबहादुर कुमार महत्तोलाई पनि कारबाही गर्न सिफारिस भएको उनले बताए।
दुबै जनालाई जिम्मेवारी पूरा नगरेको भन्दै कारबाही गर्न सिफारिस भएको हो।
विजय चमारको शरीरमा चोटपटक देखेपछि पीडित परिवारले प्रहरीको कुटपिटबाट मृत्यु भएको आरोप लगाएका थिए।
यता प्रहरीले भने उनको मिर्गौलाले काम नगरेपछि नेसनल मेडिकल कलेजमा मृत्यु भएको बताएको थियो।
प्रवक्ता बुढाले भने पोष्टमार्टम रिपोर्ट अनुसार उनको मृत्यु चोटपटकबाटै भएको बताएका छन्।
'प्रहरीले यातना दिएको हो भनेर भनेका छैनन्। तर पोष्टमार्टम रिपोर्टमा पनि चोटकै कारणले मृत्यु भएको भनेको छ,'उनले भने।
चमारलाई प्रहरीले सोही ठाउँमा निरञ्जन रामको हत्याको आशंकामा पक्राउ परेका थिए।
यस घटनामा प्रहरीले सात जनालाई पक्राउ गरेको थियो। यसअघि प्रहरीले मृतक चमारमाथि सोधपुछ गर्ने प्रहरी निरीक्षकसहित तीन जनालाई निलम्बन समेत गरेको थियो।
निलम्बन हुनेमा गरूडा कार्यालयका प्रहरी निरीक्षक नविनकुमार सिंह, प्रहरी हवल्दार हिरोज मिया धुनियाँ र मुन्ना सिंह छन्।
पीडित परिवारले जिल्ला अदालत रौतहटमा एसपी खड्कासहित ६ जनाविरूद्ध जाहेरी समेत दिएको थियो।
