वीरगन्जस्थित नारायणी अस्थायी कोभिड अस्पताल गण्डकमा उपचाररत् ७४ वर्षीय वृद्धको मृत्यु भएको छ।
वीरगन्ज छपकैया निवासी उनको बिहीबार राति साढे एक बजे मृत्यु भएको अस्पतालका चिकित्सक डाक्टर जेपी जैसवालले जानकारी दिए।
वृद्धलाई वीरगन्जकै एड्भान्स अस्पतालबाट बिहीबार राति ‘रिफर’ गरिएको थियो।
'उहाँलाई भर्ना गर्दै अवस्था गम्भीर थियो। एक्सिजन र सिपिआर दियौं तर उहाँको केहीबेरमै मृत्यु भयो,' डा. जैसवालले भने।
उनले वृद्धमा दम, मधुमेहको पनि समस्या रहेको जनाए।
केही दिनदेखि ज्वरो र सास फेर्न समस्या देखिएपछि उनी एड्भान्समा भर्ना भएका थिए।
मृतकको शव अहिले अस्पतालमै राखिएको छ।
उनको कोरोना परीक्षणको लागि स्वाब पठाइएको र रिपोर्ट आएपछि सोही अनुसार शवको व्यवस्थापन गरिने अस्पतालले जनाएको छ।
